“அரசியல் சட்டத்துக்கு எதிரானது” எனக்கூறி நகலை எதிர்க்கட்சி எம்.பி.க்கள் கிழித்து எறிந்தனர்

முதல்வர், அமைச்சர்கள் பதவி பறிப்பு மசோதாவை, பாராளுமன்றத்தில் மத்திய மந்திரி அமித்ஷா தாக்கல் செய்தார். அப்போது இந்த மசோதா அரசியல் சட்டத்துக்கு எதிரானது எனக்கூறி மசோதாவின் நகலை எதிர்க்கட்சி எம்.பி.க்கள் கிழித்து எறிந்தனர் . இதனால் சபையில் பெரும் பரபரப்பு ஏற்பட்டது.

- 

நாடாளுமன்ற மழைக்கால கூட்டத்தொடரில் பீகாரில் வாக்காளர் பட்டியல் சிறப்பு தீவிர திருத்தம் பற்றி எதிர்க்கட்சிகள் அவையில் தொடர்ந்து அமளியில் ஈடுபட்டு வருகின்றன. இதேபோன்று, நடந்து முடிந்த நாடாளுமன்ற தேர்தல் மற்றும் மராட்டிய மாநில தேர்தல்களில் முறைகேடுகள் நடந்துள்ளன என்றும், வாக்குகள் திருடப்பட்டன என்றும் மக்களவை எதிர்க்கட்சி தலைவர் ராகுல்காந்தி புகார் கூறினார். இதனை வாக்குத்திருட்டு என இந்தியா கூட்டணி கட்சியினர் குறிப்பிட்டு வருகின்றனர். இதற்கு உரிய விளக்கம் அளிக்க வேண்டும் என்றும் குரல் கொடுத்து வருகிறார்கள்.

இந்நிலையில், இந்த விவகாரம் தொடர்பாக நாடாளுமன்றத்தில் அவை நடவடிக்கைகள் நேற்றும் பாதிக்கப்பட்டன. இருப்பினும் எதிர்க்கட்சிகளின் அமளிக்கு இடையே நாடாளுமன்றத்தில் மசோதாக்கள் நிறைவேற்றப்பட்டு வருகின்றன.