குடியரசு தலைவர் எழுப்பியது மாநில உரிமை மீதான கேள்வி...

ஓர் அதிகாரத்தின் மீது எழுப்பப்பட்ட கேள்வி இப்போது உரிமை தொடர்பான கேள்வியாக மாறி நிற்கிறது. மாநில அரசின் மசோதாவை குறிப்பிட்ட கெடுவுக்குள் பரிசீலியுங்கள் என்று சாதாரண ஓர் அறிவுரையை தான் உத்தரவாக உச்ச நீதிமன்றம் வழங்கியிருந்தது. ஆனால் அதை தங்கள் அதிகாரத்துக்கு எதிரானதாக கருதி தேவையின்றி ஆளுநர்களும் குடியரசுத் தலைவர்களும் கொதித்து எழுந்துள்ளனர். உச்சநீதிமன்றத்திடம் அந்த உத்தரவு தொடர்பான விளக்கங்களை குடியரசுத் தலைவர் கேட்டிருக்கிறார். உச்ச நீதிமன்றம் போட்டிருந்தது ஒரே ஒரு உத்தரவு. ஆனால் குடியரசு தலைவர் கேட்டிருப்பது ஒரு பிரதான கேள்வியும் அதற்கு உட்பட்ட 14 கிளை கேள்விகளும். உச்சநீதிமன்றத்தின் உத்தரவு மக்கள் நலம் சார்ந்தும் குடியரசுத் தலைவரின் கேள்விகள் தங்களது அதிகார பலம் சார்ந்தும் இருப்பது அவரது கேள்விகளைப் படிக்கும் பாமர மனிதர்களுக்கும் உள்ளங்கை நெல்லிக்கனியாக தெரியும்.

- 

எப்படியாவது உச்ச நீதிமன்றத்தின் விளக்கத்தைப் பெற்று தங்களது வெறுப்புரிமை அடிப்படையில் மாநிலங்களின் மசோதாக்களை வழக்கம்போல் கிடப்பில் போடுவதே நோக்கமாக குடியரசு தலைவரின் கேள்விகளில் தொனிக்கிறது. உச்ச நீதிமன்றத்தின் விளக்கம் தீர்ப்பாகவோ, சட்ட விதியாகவோ கருதப்படாது. ஒரு வழிகாட்டும் நெறிமுறையாக வேண்டுமானால் ஏற்றுக் கொள்ளப்படும் என்று சட்ட நிபுணர்கள் கருத்து தெரிவித்திருப்பதால், அதன் மூலம் பெரிதாக ஒன்றும் இவர்களால் சாதித்துக் கொள்ள முடியாது. ஆனாலும், மாநிலங்களின் சுயேட்சை தன்மையை ஏற்றுக்கொள்ளும் பக்குவம் உச்ச பதவியில் இருப்பவர்களுக்கு இல்லை என்பதை அந்த வினாக்கள் எடுத்துக்காட்டுகின்றன.

இந்த ஜனநாயகத் தன்மைகளையெல்லாம் கடந்து மற்றொரு ஆட்சி அதிகார ஐயப்பாடும் இந்த கேள்வியால் உருவாகிறது. தமிழ்நாடு முதலமைச்சர் மு.க. ஸ்டாலின் மட்டும்தான் குடியரசு தலைவரின் கேள்வியில் தொக்கி நிற்கும் அத்தகைய உட்பொருளை உணர்ந்து கடும் எதிர்ப்பை தெரிவித்துள்ளார்.