தி.மு.க.வின் 75-வது ஆண்டு அறிவு விழாவில் முதல் அமைச்சர் மு.க. ஸ்டாலின் உரை

திராவிடம் வெல்லும்., அதை காலம் சொல்லும்

- 

“தி.மு.க.வை தேர்தல் ஆணையம் மூலம் வீழ்த்த முயற்சி நடக்கிறது. ஒரே சூரியன், ஒரே சந்திரன், ஒரே தி.மு.க. என்பதை யாரும் மறுக்க முடியாது. திராவிடம் வெல்லும்., அதை காலம் சொல்லும்” என்று தி.மு.க.வின் 75-வது ஆண்டு அறிவு விழாவில் முதல் அமைச்சர் மு.க. ஸ்டாலின் உரையாற்றினார்.

சென்னை, நவ. 9-

தி.மு.க .- வை தேர்தல் ஆணையம் மூலம் வீழ்த்த முயற்சி நடப்பதாக முதல் அமைச்சர் மு.க.ஸ்டாலின் குற்றம் சாட்டி இருக்கிறார். நேற்று (08-11-2025) கழகத் தலைவரும் தமிழ்நாடு முதலமைச்சருமான மு.க. ஸ்டாலின் கழக இளைஞரணி சார்பில் வள்ளுவர் கோட்டத்தில் நடைபெறும் “திமுக 75 - அறிவுத்திருவிழா” நிகழ்வைத் தொடங்கி வைத்து, “காலத்தின் நிறம் கருப்பு சிவப்பு - திமுக 75” நூலை வெளியிட்டுச் சிறப்புரை ஆற்றினார். அதன் விவரம் வருமாறு :-

கருப்பு சிவப்புக் கொள்கையைத் தாங்கி, களத்தில் பணியாற்றும் இளைஞரணிப் பட்டாளம் இங்கே கூடியிருப்பதைப் பார்க்கும்போது, திருவள்ளுவர் கோட்டமே திராவிடக் கோட்டமாக மாறி இருப்பதைப் பார்த்து பெருமகிழ்ச்சி அடைகிறேன்!

'காலத்தின் நிறம் - கருப்பு சிவப்பு' எனும் அறிவுக் கருவூலத்தைத் தமிழ்ச் சமூகத்துக்கு அளிக்கின்ற நூல் வெளியீட்டு விழா, தமிழ்நாட்டின் லட்சியக் கொடியாக விளங்கும் நம்முடைய கருப்பு - சிவப்பு இருவண்ணக் கொடிக்கு வயது 75 என்பதை முன்னிட்டு வரலாற்றுக் கண்காட்சி, இருநாள் கருத்தரங்கம் - முற்போக்குப் புத்தகக் கண்காட்சி என்று இளைஞரணி முன்னெடுத்திருக்கும் இந்தக் கொள்கைத் திருவிழாவில் பங்கெடுத்துள்ள உங்கள் அனைவருக்கும் எனது அன்பான வணக்கம்!