நீட் பயிற்சி! கொள்ளையடிக்கும் தனியார் பள்ளிகள்!

"தமிழகத்தில் நீட் தேர்வு நடைமுறைக்கு வந்தபிறகு, அரசுப் பள்ளி மற்றும் தனியார் மெட்ரிகுலேஷன் பள்ளிகளை பின்னுக்குத் தள்ளி சி.பி.எஸ்.இ. பள்ளிகள் பிரபலம் பெற்றுள்ளன.

- 

மேலும், பள்ளிப் பாடங்களுக்கு மட்டுமே டியூஷன் வைத்த சூழல் மாறி, நீட் கோச்சிங்கிற்காக 6-ஆம் வகுப்பிலிருந்தே கோச்சிங் அனுப்பும் மோசமான கல்விச் சூழலும், கல்லா கட்டும் சூழலும் பெருகியுள்ளது.

ஆரம்ப காலத்தில் அரசுப் பள்ளிகளில் படித்த மாணவர்கள் அவர்களின் மதிப்பெண் அடிப்படையில் உயர் கல்விக்குச் சென்றார்கள். அதில் மருத்துவப் படிப்புக்கு எப்போதும் செல்வாக்கு உண்டு. அதிக பெற்ற மாணவர்களுக்கே மருத்துவ சீட் கிடைத்தது. ஆகையால் பெற்றோர்கள் தனியார் மெட்ரிகுலேஷன் பள்ளிகளை நோக்கி படையெடுக்கத் தொடங்கினர். ஆனால் 2014-ல் நீட் தேர்வு நடைமுறைக்கு வந்த பின்னால், சி.பி.எஸ்.இ. பள்ளிகள் கவனம் பெறத் தொடங்கியுள்ளன. இதற்கு நீட் தேர்வில் கேட்கப்படும் வினாக்களில், மற்ற பாடத்திட்டங்களைவிட சி.பி.எஸ்.இ. அடிப்படையிலான பாடத்திட்டத்திலிருந்து கூடுதலாக இடம்பெறுவதும் முக்கிய காரணமாகும்.

அரசுப் பள்ளியில் படிப்பவர்களைவிட, தனியார் மெட்ரிகுலேசன் பள்ளியில் படிக்கின்ற மாணவர்களே அதிக மதிப்பெண் எடுத்து மருத்துவராக முடியும் என்கிற ஒரு மாயப் பார்வையை முதலில் கட்டமைத்தனர். அதனால் அவர்கள் சொல்லும் பணத்தை ஏனென்று கேள்வி கேட்காமல் பெற்றோர்கள் கொட்டிக் கொடுத்தனர். நீட் வருகைக்குப் பிறகு சி.பி.எஸ்.இ. பள்ளியில் படித்தால் மட்டுமே நீட் தேர்வில் வெற்றி பெற முடியும் என்கிற மாய பிம்பம் மெல்ல மெல்ல கட்டமைக்கப்படுகிறது.

அதன் மூலம் தற்போது சி.பி.எஸ்.இ. பள்ளிகளை நோக்கி பெற்றோர்களை படையெடுக்க வைத்துள்ளனர். இதனால் சி.பி.எஸ்.இ. தனியார் பள்ளி உரிமையாளர்கள் காட்டில் அடைமழைதான். மிக முக்கியமாக அவர்களுக்கு கட்டணம் எதையும் முறையாக அரசு நிர்ணயம் செய்யவில்லை, சி.பி.எஸ்.இ. பள்ளிகள் நிர்ணயம் செய்வதே கட்டணமாக உள்ளது. அதுதவிரவும் பெரும்பாலான சி.பி.எஸ்.இ. தனி பள்ளிகளில் ஆறாம் வகுப்புகளிலிருந்தே நீட் கோச்சிங் கொண்டு வந்து, தனியார் நீட் கோச் சென்டர்களுக்கு இணையாகப் பணத்தைப் பறிக்கின்றனர் என பரவலாக குற்றச்சாட்டுகள் எழத் தொடங்கியுள்ளன. தமிழகத்தில் உள்ள தனியார் பள்ளிகள் 12,302, அரசு உதவிபெறும் பள்ளிகள் 8,323, அரசுப் பள்ளிகள் 37,507 என மொத்தமாக 58,641 பள்ளிகள் செயல்பட்டுவருகின்றன.