અમેરિકાને પડ્યો સૌરાષ્ટ્રની મગફળીમાં રસ

અમેરિકાના ‘નૅશનલ પીનટ બોર્ડના ચૅરમૅન પાર્કર બોબઃ ‘સ-રસ' છે અહીંના સિંગદાણા.

- દેવેન્દ્ર જાની (રાજકોટ) કેતન મિસ્ત્રી (મુંબઈ)

એક તરફ, અમેરિકાએ ભારતથી આયાત થતી કેટલીક ચીજો પર ઊંચી ટેરિફ નાખી છે એની ચર્ચા છે ત્યારે બીજી તરફ, અમેરિકાને સૌરાષ્ટ્રની કૃષિજણસ મગફળીમાં ઊંડો રસ પડ્યો છે.

વાત જાણે એમ છે કે અમેરિકાના કૃષિ વિભાગ હસ્તકના નૅશનલ પીનટ બોર્ડના ચૅરમૅન અને ચીફ એક્ઝિક્યુટિવ ઑફિસર પાર્કર બોબ હમણાં સૌરાષ્ટ્રના સૌથી મોટા એવા ગોંડલ માર્કેટ યાર્ડની મુલાકાતે આવ્યા, મગફળીની ગુણવત્તાની જાતતપાસ કરી અને કેટલાક ખેડૂતો સાથે સંવાદ પણ કર્યો. એટલું જ નહીં, યાર્ડના ચૅરમૅન અલ્પેશ ઢોલરિયા સાથે મગફળીનાં બિયારણ, ખેતીની પદ્ધતિ અને રિસર્ચ વિશે કરાર કર્યા.

અમેરિકાના કૃષિ નિષ્ણાત પાર્કર બોબની ગોંડલ યાર્ડની મુલાકાતથી સૌરાષ્ટ્રની મગફળીની જાતને વૈશ્વિક સ્તરે મોટો ફાયદો થશે એનો આનંદ ખેડૂતો અને યાર્ડના હોદ્દેદારોને છે. અમેરિકામાં મગફળીનાં વાવેતર અને સંશોધનના ક્ષેત્રે ક્રાંતિ લાવવામાં એમનો મોટો ફાળો છે. મગફળીનું તેલ સ્વાસ્થ્ય માટે કેટલું ઉપયોગી છે એ વિશે પણ એમણે રિસર્ચ કર્યું છે. પાર્કર બોબે ગોંડલ યાર્ડમાં ખેડૂતો ઉપરાંત દલાલ મંડળ સાથે પણ વાતચીત કરી અને એના વેચાણની રીત અંગે માહિતી મેળવી.