કેન્વાસ પર ખીલવ્યાં શ્રદ્ધાનાં સુમન

ચિત્રકળાનો શોખ એને નાનપણથી. સમય-સંજોગથી કળાક્ષેત્રે શિક્ષણ ન મળ્યું અને કરિયર જુદી દિશામાં ફંટાઈ ગઈ. જો કે ગૃહસ્થીમાં ઠરીઠામ થયાનાં વર્ષો પછી એણે ફરી પેન્ટિંગ્સ પર હાથ અજમાવ્યો ને લો, એનાં ચિત્ર પ્રદર્શન નામાંકિત આર્ટ ગૅલરીમાં યોજાવા માંડ્યાં. મળીએ, મુંબઈનાં આ કલાવંત માનુનીને.

- સમીર પાલેજા

સારું થયું છોકરીને જે.જે.માં ઍડ્મિશન ન મળ્યું. ભલું થયું ભાંગી જંજાળ... મુંબઈની પ્રસિદ્ધ જે.જે. સ્કૂલ ઑફ આર્ટ્સમાં દીકરી મોનાલિસાને પ્રવેશ ન મળ્યો ત્યારે પિતા બિપિનચંદ્ર રાજી થઈ ગયા હતા. એક તો એમને પહેલેથી જ ઈચ્છા હતી કે પુત્રી પણ પોતાની જેમ પેથોલૉજિસ્ટ બને. એ એમ પણ માનતા કે ચિત્રકામની લાઈનમાં પૈસા બહુ નહીં મળે.

છેવટે દીકરી પેથોલૉજી ભણી ખરી અને મુંબઈમાં તે વખતે ખ્યાતનામ ડૉ. અમીન્સ લેબમાં અમુક વર્ષ કામ પણ કર્યું. જો કે જીવનના આગળના તબક્કામાં એ છોકરીના હાથ આખરે તો પીંછી તરફ વળી જ ગયા.

હવે વર્તમાનમાં આવીએ તો, મોહમયી મુંબઈના ઉપનગર સાંતાક્રુઝના એક આલીશાન ઘરમાં અમે આર્ટિસ્ટ મોનાલિસા પરીખને મળીએ છીએ. સુઘડતાથી સજાવેલા વિશાળ ફ્લૅટમાં એમણે જાતે બનાવેલાં અમુક પેન્ટિંગ્સ દીવાલોની શોભા વધારે છે. હમણાં મુંબઈની અતિ જાણીતી જહાંગીર આર્ટ ગૅલરીમાં એમનાં ચિત્રોનું પ્રદર્શન સંપન્ન થયું, એનો સંતોષ એમના ચહેરા પર છલકે છે. સાથે જ આગામી દિવસોમાં યોજાનારા મુંબઈ આર્ટ ફેરમાં સહભાગી થવાની તૈયારીમાં પણ એ ડૂબેલાં છે.

મોનાલિસા પરીખ પ્રિયદર્શિનીને કહે છે: ‘પપ્પાની ઈચ્છાથી પેથોલૉજીમાં કરિયર બનાવી ત્યારે એમણે ઘરની લંબમાં ન રાખી, પણ એશિયાની તત્કાલીન સૌથી મોટી અને સૌથી આધુનિક ડૉ. અમીન્સ લંબમાં મોકલી. સમય જતાં મૅરેજ થયાં એટલે ગૃહસ્થીમાં ધ્યાન આપવા લૅબ છોડી. શરૂઆતનાં વર્ષો તો ફૅમિલી અને દીકરા-દીકરીના ઉછેરમાં નીકળી ગયાં. દરમિયાન સાસુજીને કિડનીની તકલીફ થઈ. એમની પાસે ડાયાલિસિસ વખતે બેસવું પડે. બેઠાં બેઠાં કાગળ પર લિસોટા પાડીને જૂનો શોખ જીવંત કરવા માંડી. શરૂઆતમાં નાના કાગળ, પછી મોટા પેપર અને છેવટે કૅન્વાસ પર મારા વિચારો ચિત્રમાં ફેરવાતા ગયા.'