દુનિયા થી છૂપી અબ ખૂલ ગઈ… મુસ્કુરાહટ તેરી રાસ્તા દિખા ગઈ

સ્મિત એ આત્માનું નાનું, પરંતુ સૌથી શક્તિશાળી આભૂષણ છે. એ એક એવી ભાષા છે, જેનો અર્થ દુનિયાનું કોઈ પણ હૃદય સમજી જાય છે. દર વર્ષે ઑક્ટોબરના પહેલા શુક્રવારે ઊજવાતો ‘વર્લ્ડ સ્માઈલ ડે’ યાદ અપાવે છે કે એક નાની સ્મિતલહર દુનિયા બદલવા પૂરતી છે.

- કેતન મિસ્ત્રી (મુંબઈ) । મહેશ શાહ (અમદાવાદ) । દેવેન્દ્ર જાની (રાજકોટ)

છપાંના ખૂણેખાંચરેથી ક્યારેક એવા સમાચાર મળે, જે ચહેરા પર સ્મિતની લહેરખી મૂકી જાય. અંગૂઠો સુજાડી દેતા, બૅકગ્રાઉન્ડમાં ખોટ્ટાડા ખી...ખી...ખીના અવાજ કાઢીને પરાણે હસાવતી ઈન્સ્ટા રીલ્સમાં પણ આવી ગમ્મત આવતી નથી.

એક કિસ્સો જુઓઃ બન્યું એવું કે દિલ્હીમાં બે પડોશી વચ્ચે પાલતુ શ્વાનના મુદ્દે એવા ઘાતક ઝઘડા થયા કે વાત પોલીસસ્ટેશન સુધી પહોંચી. બન્ને સામે પોલીસે એફઆઈઆર નોંધ્યા. પખવાડિયા પહેલાં કોર્ટમાં સુનાવણી થઈ ત્યારે ન્યાયાધીશે ખરા અર્થમાં અદલ ઈન્સાફ કર્યો. એમણે બન્નેને કહ્યું: ‘એફઆઈઆર રદ કરાવવા હોય તો સરકારી શાળાનાં ગરીબ બાળકોને ગરમાગરમ પિઝા અને તાજી ઠંડી છાશથી તૃપ્ત કરો, એમના ચહેરા પર સ્માઈલ લાવો!' મજાની વાત એ કે બે ફરિયાદીમાંથી એકની પિઝાની રેસ્ટોરાં છે. જજે હથોડો પછાડતાં કહ્યુંઃ ‘તમારી રેસ્ટોરાંના મેનુમાં જે પિઝા છે એ જ આપજો.

સસ્તા પિઝા આપીને ચીટિંગ નહીં કરતા...' આમ ઝઘડાનું સમાધાન થયું, સમાજસેવા થઈ, બાળકોના ચહેરા પર સ્મિત ફરકી ગયાં, પડોશીના ગુસ્સા ઓગળ્યા અને એમના ચહેરા પર પણ સ્મિત આવી ગયાં. ગંભીર ઝઘડાને કોર્ટે પિઝા પાર્ટી બનાવી દીધી.

દર વર્ષે ઑક્ટોબરનો પહેલો શુક્રવાર ભાષા-ભૌગોલિક સીમાડા, રાજકારણ કે ધર્મની મર્યાદા વગર દુનિયાભરમાં વર્લ્ડ સ્માઈલ ડે તરીકે ઊજવાય છે. ૧૯૬૩માં હાર્વે બોલ નામના કલાકારે આઈકનિક સ્માઈલી ફેસ ઈમોજી રચેલું. આ ઈમોજીનો મૂળ ભાવ ફરી જીવંત કરવા સ્માઈલ ડેની શરૂઆત જો કે છેક ૧૯૯૯માં થઈ. હાર્વે સાહેબને લાગ્યું કે સ્માઈલીના પ્રચંડ વેપારીકરણથી એની પાછળની ભાવના મરી રહી છે. ગોળાકારમાં હસતી આંખો, હસતા હોઠવાળા ચિહ્નને શુભેચ્છા અને અનુકંપાનું પ્રતીક બનાવવા એમણે આ દિવસ ઊજવવાની શરૂઆત કરી. મિસ્ટર હાર્વેનું કહેવું છે કે ખુશી બાયોલૉજિકલ છે. હોઠ પર સ્મિત ફરકાવવા થી શરીરમાં એન્ડોર્ફિન નામનું હોર્મોન નીકળે છે અને અંતરમાં આનંદના ફુવારા ઊડે છે. સ્માઈલી ફેસ માટે એમણે પીળો રંગ પસંદ કર્યો, કારણ કે યલો કલર એ ખુશીનું પ્રતીક છે.