અહીં સાચા અર્થમાં માનવની સેવા થાય છે...

આજની મોંઘવારીમાં કોઈ એક ટંક પણ મફત ભોજન ન આપે ત્યારે નડિયાદમાં એક સામાજિક સંસ્થા રોજ બે હજાર લોકોને વિનામૂલ્યે ભોજન આપે છે. આ સંસ્થાએ નિરાધાર બા-દાદા માટે ‘દીકરાનું ઘર’ પણ બનાવ્યું છે. ‘જય માનવસેવા પરિવાર ટ્રસ્ટ’ની બીજી અનેક સેવાકીય પ્રવૃત્તિ વિશેય જાણવા જેવું છે.

- હેતલ રાવ

રોટી, કપડાં અને મકાન દરેક માનવની પ્રથમ જરૂરત છે, પરંતુ સમાજમાં અનેક લોકો આજે પણ બે ટંક ખાવાનું નથી પામતા. જો કે ભગવાન ભૂખ્યા ઉઠાડે છે, પરંતુ ભૂખ્યા સૂવા દેતા નથી એ ઉક્તિને સાર્થક કરવા માટે સમાજના ઘણા સેવાભાવી લોકો અને અનેક સંસ્થા સક્રિય છે. નડિયાદસ્થિત જય માનવસેવા પરિવાર ટ્રસ્ટ હકીકતમાં નડિયાદમાં કોઈને ભૂખ્યા સૂવા દેતું નથી. આ પરિવાર રોજ ૨૦૦૦ લોકોને વિનામૂલ્યે ભોજન આપે છે.

એટલું જ નહીં, ફૂટપાથ અને ઝૂંપડપટ્ટીમાં રહેતા જરૂરતમંદ લોકોને સાંજે ગરમાગરમ ભોજન સાથે ટિફિનસેવા પણ પૂરી પાડે છે, એ પણ નિઃશુલ્ક. એ ઉપરાંત, સમગ્ર શહેરમાં કોઈ પણ જગ્યાએ અંતિમ રથ-અંતિમ કિટ અને શ્રદ્ધાંજલિસેવા પણ ટ્રસ્ટ તરફથી ચાલે છે. ટ્રસ્ટ દ્વારા સંચાલિત દીકરાનું ઘરવૃદ્ધાશ્રમમાં અત્યારે ૯૦ બા-દાદા વિનામૂલ્યે રહે છે. એમની સંપૂર્ણ જવાબદારી ટ્રસ્ટ ઉપાડે છે.

આ બધી પ્રવૃત્તિ કેવી રીતે ચાલતી હશે એવો વિચાર સહેજે થાય. તો બેશક એના માટે દાતાઓની આર્થિક મદદ મળે છે, પણ આ સેવાયજ્ઞનો આરંભ તો એક વ્યક્તિએ જ કર્યો હતો.

જે વ્યક્તિ ભૂખમાંથી નીકળે એને ભૂખની ખબર પડે...

આ શબ્દો છે જય માનવસેવા પરિવાર ટ્રસ્ટના ટ્રસ્ટી મનુભાઈ જોષીના.