હવે કૅપિટલ માર્કેટ રિફોર્મ્સ... લાંબી ને મજબૂત તેજીની તૈયારી

અમેરિકન ટેરિફ સહિત ગ્લોબલ પડકારો સામે કેન્દ્ર સરકાર સજ્જ થઈ રહી છે ત્યારે આર્થિક વિકાસને વેગ આપવાના ઉદ્દેશ સાથે તાજેતરમાં સેબીએ કૅપિટલ માર્કેટ રિફોર્મ્સ જાહેર કર્યા છે, જેના પ્લસ-માઈનસ પૉઈન્ટ્સ સમજી લેવા જોઈએ.

- જયેશ ચિતલિયા

વૈશ્વિક પડકારોનો સામનો કરવા અને અનિશ્ચિતતાના માહોલમાં આગળ વધવા કેન્દ્ર સરકાર એક પછી એક રિફોર્મ્સ હાથ ધરતી જાય છે, જેમાં તાજેતરના જીએસટી રિફોર્મ્સ તો અર્થતંત્ર પર લાંબા ગાળાની અસરો ઊભી કરશે એ નક્કી છે ત્યારે મૂડીબજારની નિયમન સંસ્થા સેબી (સિક્યોરિટીઝ ઍન્ડ એક્સચેન્જ બોર્ડ ઑફ ઈન્ડિયા)એ કૅપિટલ માર્કેટ રિફોર્મ્સ પર ધ્યાન કેન્દ્રિત કર્યું છે, જેમાં ફોરેન ઈન્વેસ્ટમેન્ટના પ્રવાહને વધારવા અને આઈપીઓ માટે માર્ગ સરળ બનાવવા સહિત વિવિધ નક્કર લક્ષ્યો સામેલ છે.

આઈપીઓ માટેનો માર્ગ સરળ

કૅપિટલ માર્કેટના રિફોર્મ્સ આમ તો પાઈપલાઈનમાં હતા જ, પરંતુ ટ્રમ્પ ટેરિફ પ્રકરણ આ સુધારાને પણ ઝડપ આપવામાં નિમિત્ત બન્યું છે. સૌપ્રથમ આ સુધારા (રિફોર્મ્સ)ની એક ઝલક જોઈએ તો સેબીએ ફોરેન પોર્ટફોલિયો ઈન્વેસ્ટર્સ માટે ભારતીય માર્કેટમાં પ્રવેશવાનું વધુ સરળ બનાવ્યું છે, વિશાળ કંપનીઓના આઈપીઓને પણ સરળતા કરી આપી, ઍન્કર ઈન્વેસ્ટર્સના ફાળાની મર્યાદા વધારી દેવા સાથે ઈન્સ્યોરન્સ કંપનીઓ અને પેન્શન ફંડ્સને પણ ઍન્કર ક્વાંટામાં ભાગ લેવાની છૂટ આપી.

એક નોંધનીય પગલું રિયલ એસ્ટેટ ઈન્વેસ્ટમેન્ટ ટ્રસ્ટ (રિટ)ને ઈક્વિટીનો દરજ્જો આપવાનું નક્કી કર્યું છે, જે જીએસટી રાહત બાદ રિયલ એસ્ટેટ સેક્ટરને અપાયેલું વધુ એક બૂસ્ટર ગણી શકાય. આ ઉપરાંત, સેબીએ ઑલ્ટરનેટિવ ઈન્વેસ્ટમેન્ટ ફંડની યોજનાઓને રોકાણ આકર્ષવા પ્રોત્સાહન આપ્યું છે.