પર્યાવરણના પ્રહરી એટલે ગ્રીન કૅટાલિસ્ટ

અમદાવાદના ભાવિન નામના યુવાને સોસાયટીમાં મોટું વૃક્ષ કાપી નાખનારા પડોશી સામે સોસાયટીના પ્રમુખ અને પોલીસને લેખિત ફરિયાદ કરી.

- મહેશ શાહ (અમદાવાદ)

અમદાવાદના ભાવિન નામના યુવાને સોસાયટીમાં મોટું વૃક્ષ કાપી નાખનારા પડોશી સામે સોસાયટીના પ્રમુખ અને પોલીસને લેખિત ફરિયાદ કરી.

પરિતોષે એક ગામની શાળાના છોકરાઓને શાળાનાં બલ્બ, ટ્યૂબલાઈટ અને પંખાની સફાઈ અને એનો ઉપયોગ ન હોય ત્યારે સ્વિચ બંધ રાખીને વીજબચત કરવાની સમજ આપી.

થેન્ક્સ ટુ ગ્રીન કૅટાલિસ્ટ. એ છે પર્યાવરણ સંરક્ષણ અંગે યુવાનોમાં જાગૃતિ આણવાની અનેરી પ્રવૃત્તિ, જેમાં અહીંના ભાવિન અને પરિતોષ જેવા અનેક યુવકો સ્વેચ્છાએ જોડાયા છે. હવે એ પર્યાવરણનાં રક્ષણ અને જતન અંગે બીજા યુવકોને સમજ આપે છે.

ગ્રીન કૅટાલિસ્ટ એટલે હરિયાળા ઉદ્દીપક. એના સ્થાપક-સંચાલક મહેશ પંડ્યા એન્વાયર્નમેન્ટલ એન્જિનિયર અને અમદાવાદમાં ૧૯૯૭માં સ્થપાયેલી પર્યાવરણ મિત્ર સંસ્થાના નિયામક છે. એમણે પ્રકાશન, ચર્ચા, તાલીમ, કાનૂની કાર્યવાહી, લોકસુનાવણી, વગેરે પ્રવૃત્તિ કરી છે. એ અનુભવને આધારે એમણે પર્યાવરણ સંરક્ષણ, શિક્ષણ, જાગૃતિનો આઠેક વર્ષ પહેલાં રાજ્યનો પ્રથમ ગ્રીન કૅટાલિસ્ટ પ્રોજેક્ટ શરૂ કર્યો.

મહેશ પંડ્યા ચિત્રલેખાને કહે છેઃ ‘પર્યાવરણમાં જમીન, ખેતી, વીજબચત, ઊર્જાબચત, વગેરેનો પણ સમાવેશ થાય છે. પર્યાવરણ અંગેના કાયદાથી ઘણા લોકો અજાણ છે એટલે યુવાનોને પર્યાવરણની સમજ આપવા ગ્રીન કૅટાલિસ્ટ પ્રોજેક્ટ શરૂ કર્યો.'