સપનાંને સાચાં કરવાનો કીમિયો

મૅનિફેસ્ટેશન શાહરુખ ખાનની ફિલ્મ ‘ઓમ શાંતિ ઓમ’માં એક મશહૂર સંવાદ છેઃ ‘કહેતે હૈ કિસી ચીજ કો અગર શિદ્દત સે ચાહો તો પૂરી કાયનાત ઉસે તુમસે મિલાને કી કોશિશ મેં લગ જાતી હૈ.’ મૅનિફેસ્ટેશનનું આ સૌથી જાણીતું ઉદાહરણ છે. એનો અર્થ થાય છે કે આપણે જે વિચાર કે ઈચ્છા પર પૂરી તાકાતથી ધ્યાન કેન્દ્રિત કરીએ તો એ હકીકતમાં બદલાઈ શકે છે.

- રાજ ગોસ્વામી

જિમ કેરીનો ચેક...

હોલીવૂડના વિખ્યાત કૉમેડિયન જિમ કૅરીએ અમેરિકાની જાણીતી ટીવી હોસ્ટ ઓપ્રાહ વિન્ફ્રે સાથે ફેબ્રુઆરી, ૧૯૯૭માં એક ઈન્ટરવ્યૂમાં રસપ્રદ વાત કરી હતી.

૧૯૮૫માં જિમ સ્ટૅન્ડ-અપ કૉમેડિયન હતો અને હોલીવૂડમાં બ્રેક મેળવવા ચપ્પલ ઘસી રહ્યો હતો. એ કેનેડામાં એના બેરોજગાર પિતાની પ્રેરણાથી લોસ એન્જલિસ આવ્યો હતો. જિમનું સપનું હતું કે એને ફિલ્મોમાં કામ મળશે ત્યારે એના નામે તગડા ચેક આવશે અને એની ગરીબી દૂર થઈ જશે. જિમને એની પ્રતિભા પર ભરોસો અને દિલમાં એટલો આશાવાદ હતો કે એક દિવસ એણે અજીબ હરકત કરીઃ એણે જાતે જ પોતાના નામે એક કરોડ ડૉલરનો ચેક લખ્યો, એના પર ઍક્ટિંગની સર્વિસ આપવા પેટે લખ્યું અને તારીખ લખી દસ વર્ષ પછીના થેન્ક્સ ગિવિંગ ડેની!

જિમે કલ્પના કરી હતી કે એક દિવસ એના નામે દસ મિલિયનનો ચેક આવશે. એ રોજ આ ચેક ખીસામાં લઈને ફરતો હતો, જેથી એને એનું લક્ષ્ય યાદ રહે. સમય જતાં એ ચેક ચૂંથાઈ ગયો અને ૧૯૯૪માં એના પિતાનું અવસાન થયું ત્યારે જિમે એમના સપોર્ટની યાદમાં ચેકને કૉફિનમાં મૂક્યો હતો.

મજાની વાત એ છે કે ચેક પર એણે દસ વર્ષ પછી ૧૯૯૭ના થેન્ક્સ ગિવિંગ ડેની જે તારીખ લખી હતી, એના થોડા જ સમય પહેલાં ડમ્બ ઍન્ડ ડમ્બર ફિલ્મ માટે એને દસ મિલિયનનો ચેક મળ્યો હતો! જિમે ઈન્ટરવ્યૂમાં કહ્યું હતુંઃ ‘હું જ્યારે પણ કશુંક ઈચ્છતો હતો ત્યારે એને મૅનિફેસ્ટ કરતો હતો.’

***

આજકાલ એક નવો શબ્દ ચલણમાં આવ્યો છેઃ મેનિફેસ્ટેશન (Manifestation). સોશિયલ મિડિયા, ખાસ કરીને ટિકટોક અને ઈન્સ્ટાગ્રામ જેવાં પ્લૅટફૉર્મ્સ પર સક્રિય નવી પેઢીમાં આ શબ્દ બહુ લોકપ્રિય થયો છે. જેને જેન-ઝી કહે છે એવા યુવા લોકો એમનાં લખાણો કે વાતોમાં મૅનિફેસ્ટેશનને સેલ્ફ-હેલ્પના દસ્તૂર તરીકે વર્ણવે છે. તેઓ એમની ઈચ્છાઓ પૂરી કરવા માટે એને મૅનિફેસ્ટ કરવાની સલાહ આપે છે. એને સબકૉન્સિયસ માઈન્ડની તાકાત અથવા લૉ ઑફ એટ્રેક્શન પણ કહે છે.