ભારતીય અર્થતંત્ર સામેના પડકારોને તકમાં ફેરવીએ તો...

સાચું કહેજો, ભારતીય અર્થતંત્રના વિકાસ વિશે તમે શું માનો છો? માત્ર શૅરબજારની ચાલ અને હાલને જોઈને જવાબ નહીં આપતા. શૅરબજાર ભલે ઈકોનોમીનું બેરોમીટર ગણાતું, પરંતુ ખરેખર સ્ટૉક માર્કેટ તો માત્ર સંકેત છે, એને પૂર્ણ આધાર માની શકાય નહીં. આટલી પાયાની સમજ સાથે આપણે દેશના અર્થતંત્ર વિશે વૈશ્વિક સંસ્થા-ગ્લોબલ ઈન્વેસ્ટર્સ શું માને છે એના પર નજર કરીએ.

- જયેશ ચિતલિયા

હમણાં જ ટોચના ગ્લોબલ ઈન્વેસ્ટમેન્ટ ગ્રુપ બૅકસ્ટોનના વડાએ કહ્યું છે કે અમેરિકી પ્રાઈવેટ ઈક્વિટી ગ્રુપ માટે ભારત દર વરસે ૪૦ ટકા ગ્રોસ વળતર આપતી માર્કેટ છે. અમે ૨૦૦૫માં આ માર્કેટમાં પ્રવેશવાનો નિર્ણય લીધો ત્યારે અમે અહીં એક અબજ ડૉલરનું રોકાણ કરવાનું નક્કી કર્યું હતું, જે એ સમયે બહુ મોટી રકમ ગણાતી. આજે અમે અહીં અનેકગણું વધુ રોકાણ ધરાવીએ છીએ, કારણ કે ભારતીય બજાર બહેતર આશાસ્પદ બજાર છે. અહીં અમે લાંબો સમય બિઝનેસ કર્યો છે અને વિશ્વની અન્ય કોઈ પણ બજાર કરતાં સારું વળતર મેળવી રહ્યા છીએ. હવે અમે અહીં ૧૦૦ અબજ ડૉલર સુધી ઈન્વેસ્ટમેન્ટ ધરાવવાનું લક્ષ્ય રાખીએ છીએ.

ભારતનાં ફંડામેન્ટલ્સ મહત્ત્વનાં: બ્લેકસ્ટોન