ત્રીજી રાજકીય ઈનિંગ્સમાં બાપુ કેટલા સફળ થશે?

૮૪ વર્ષના શંકરસિંહ વાઘેલા હવે ‘પ્રજાશક્તિ ડેમોક્રેટિક પાર્ટી' નામે નવો રાજકીય પક્ષ લઈને ફરી વાર ગુજરાતના રાજકીય રણમેદાનમાં કૂદ્યા છે. બાપુનો આ રાજકીય દાવ ખરેખર છે શું?

- કેતન ત્રિવેદી (ગાંધીનગર)

શંકરસિંહ વાઘેલા... ગુજરાતના રાજકારણનું એક ટનાટન નામ. હા, વર્ષ ૧૯૯૬માં ભાજપથી છેડો ફાડીને એમણે રાષ્ટ્રીય જનતા પાર્ટીની સ્થાપના કરી એ વખતે આ ટનાટન શબ્દ એમણે ગુજરાતના જાહેરજીવનમાં રમતો મૂક્યો હતો. એમની સરકાર પણ ટનાટન સરકાર તરીકે ઓળખાતી.

આ શંકરસિંહ વાઘેલા ઉર્ફે બાપુ હવે ફરીથી મેદાનમાં આવ્યા છે આ વખતે પ્રજાશક્તિ ડેમોક્રેટિક પાર્ટી નામનો નવો પક્ષ લઈને. બાવીસ ડિસેમ્બર, રવિવારે અમદાવાદમાં એક જાહેરસભામાં દાંતાના રાજવી રિદ્ધિરાજસિંહની પક્ષના પ્રમુખપદે તાજપોશી કરીને બાપુએ ટનાટન રીતે ગુજરાતના રાજકારણમાં એક નવા અધ્યાયનો આરંભ કર્યો છે.

આમ તો, બાપુની રાજકીય રીતે આ ત્રીજી ઈનિંગ્સ છે. ૧૯૯૬માં કેશુભાઈ પટેલની સામે ખુલ્લો બળવો પોકારીને એમણે રાષ્ટ્રીય જનતા પાર્ટી (રાજપા)ની સરકાર બનાવી એ એમની પહેલી ઈનિંગ્સ. એ પછી બાપુ કોંગ્રેસમાં ગયા અને પ્રદેશપ્રમુખ બન્યા. કોંગ્રેસ છોડીને શરદ પવારની એનસીપીમાં ગયા. વચ્ચે ૨૦૧૭ની ગુજરાત વિધાનસભાની ચૂંટણીમાં જન વિકલ્પ મોરચો બનાવીને પોતાના ઉમેદવારોને ચૂંટણી લડાવી. આ મોરચો કોઈ વિધિસરનો રાજકીય પક્ષ નહોતો, પણ સ્વતંત્ર રાજકીય સંગઠનની બાપુની એ હતી બીજી ઈનિંગ્સ. વચ્ચે થોડોક સમય એ શરદ પવારના પક્ષ એનસીપીમાં પણ જઈ આવ્યા.

પાંચ દાયકાના જાહેરજીવનમાં બાપુ પાંચ વખત લોકસભા અને એક વખત રાજ્યસભામાં ચૂંટાયા છે. ગુજરાતના મુખ્ય મંત્રી ઉપરાંત વિરોધ પક્ષના નેતા અને કેન્દ્રમાં ડૉ. મનમોહન સિંહની સરકારમાં કાપડમંત્રી પણ રહી ચૂક્યા છે. છેલ્લા કેટલાક સમયથી રાજકીય એકાંત ભોગવતા આવેલા બાપુ હવે પ્રજાશક્તિ ડેમોક્રેટિક પાર્ટીના નામે ત્રીજી ઈનિંગ્સ રમવા મેદાનમાં ઊતર્યા છે. આમ તો આ પાર્ટીની રચના વર્ષ ૨૦૨૨માં ઑલરેડી થઈ ચૂકેલી, પણ એ સમયે પક્ષનું લૉન્ચિંગ ન થઈ શક્યું એટલે હવે વિધિવત્ રીતે આ પક્ષનું ઉદ્ઘાટન થયું છે.