વીરપુરથી કોચી સુધી જલારામજયંતીની ધૂમ

ખાસ્સી ગુજરાતી વસતિ ધરાવતા કોચીના ‘મિની હરિદ્વાર' સમા મટનચેરી વિસ્તારનું જલારામ ધામ.

- જયેશ દવે (ભાવનગર) દેવેન્દ્ર જાની (રાજકોટ)

જ્યાં ટુકડો ત્યાં હરિ ઢૂંકડો...ને પોતાનો જીવનમંત્ર બનાવી અન્નદાનનો મહિમા વધારનારા સંત શિરોમણિ જલારામ બાપાની ૨૨૫મી જન્મતિથિ (આઠ નવેમ્બર) બાપાના જન્મસ્થાન વીરપુર-સૌરાષ્ટ્ર જ નહીં, છેક દક્ષિણે કેરળના કોચી સુધી ધામધૂમથી ઊજવવામાં આવી રહી છે. જલારામજયંતી નિમિત્તે વીરપુરને ધજા, પતાકા અને કમાનથી શણગારવામાં આવ્યું છે. સેંકડો ભાવિકો હમણાં વીરપુર આવી જલારામ બાપાની જગ્યાનાં દર્શન કરી મહાપ્રસાદનો લાભ લઈ રહ્યા છે.