અંગદાન કરનારા અને લેનારામાં છે આવો ભેદભાવ

સ્ત્રી કરતાં પુરુષ અનેક વાતે ચઢિયાતા ગણાય છે તો ઑર્ગન ડોનેશનમાં કેમ પાછળ છે?

- ડૉ. મિતાલી સમોવા

સ્ત્રી અને બલિદાન એકબીજાનાં પૂરક છે નહીં, પરંતુ પિતૃસત્તાક વ્યવસ્થાએ એને બનાવી દીધાં છે. આ જ કારણે લૈંગિક અસમાનતા (સ્ત્રી-પુરુષ-અન્ય)ની વાત કરીએ એટલે લોકોને બસ, લગ્નજીવનની સમસ્યા કે બળાત્કાર કે યુદ્ધોનાં બલિદાન જ દેખાય છે, પરંતુ લૈંગિક અસમાનતા ખૂબ અંદરખાને પ્રવેશી ચૂકેલી બદી છે, એની સમજણ લોકોને હોતી નથી. એનું પરિણામ એ આવે છે કે સ્ત્રીને અલગ અલગ પ્રકારનાં શોષણ અને વિચિત્ર ભેદભાવોનો સામનો કરવો પડે છે.

આનું એક તાજું ઉદાહરણ હમણાં લાઈવ ઑર્ગન ટ્રાન્સપ્લાન્ટના બહાર આવેલા આંકડા છે. એમ જુઓ તો પ્રિયજન માટે અંગદાન કરવાં એ સરાહનીય કામગીરી ગણાય અને મોટે ભાગે બધા એ પ્રેમથી કરવા ચાહે, જો પોતાના નાનકડા અંગદાનથી કોઈનું જીવન બચતું હોય તો! પરંતુ એ ફક્ત પ્રેમભાવ કે બલિદાન છે કે સામાજિક કુરિવાજોની અસર?