વેદનાની હાઈ-ટેક વસૂલાત...

પેજર, વૉકીટૉકી બૉમ્બધડાકા, એક જ હવાઈ હુમલામાં સાડા ચારસોથી વધુ લેબનીસ નાગરિકનાં મોત... લેબેનોનમાં હિઝબુલ્લાહના વિનાશવાદીઓ સામે બદલો લેવા ઈઝરાયલે કરેલા હાઈ-ટેક અટેક પાછળ જેનું ભેજું કામ કરે છે એ યુનિટ તથા એની વિવિધ કામગીરીની અલ્પ જાણીતી વાતો.

- કેતન મિસ્ત્રી (મુંબઈ)

૧૯૯૪ના ઑક્ટોબરની ખુશનુમા સવારે ઈઝરાયલના મૉડર્ન શહેર તેલ અવીવના ડિઝેનગોફ સ્ટૉપ પર એક લોકલ બસ ઊભી રહે છે. સાલેહ અબ્દુલ રહીમ નામનો પાતળો યુવાન ત્યાં ઊતરવાનો હોય એમ ઊભો થાય છે, પણ સીટ નીચે મૂકેલી બૅગ લેતો નથી. એ પોતાના જૅકેટના ખીસામાં સ્વિચ દબાવે છે, જેનાથી બેંગની અંદર વીસ કિલો જેટલા દારૂગોળા ટ્રાઈનિટ્રોટોલિન (ટીએનટી) સાથે કનેક્ટ થયેલા વાયર લૅન્ડમાઈન બૉમ્બ ઍક્ટિવેટ થાય છે. બસના તથા આસપાસનાં વાહનના ખુરદા બોલી જાય છે. આ આત્મઘાતી હુમલામાં ૨૧ ઈઝરાયલીનાં મોત થાય છે. સાલેહ મરવાની તૈયારી સાથે જ મોતનો સામાન લઈને બસમાં ચડેલો. ઈઝરાયલી લશ્કરે એના મોટા ભાઈને મારી નાખેલો એટલે એને બદલો લેવો હતો.

જો કે આ સુસાઈડ બૉમ્બ અટેક પાછળનું ભેજું હતું યાહા અય્યાશ નામના જુવાન એન્જિનિયરનું. ભણેલોગણેલો ભેજાબાજ યાહા અવનવા ઘાતકી બૉમ્બ બનાવવામાં એક્કો હતો. હમસ તરીકે ઓળખાતા પેલેસ્ટિનિયન સુન્ની ઈસ્લામિસ્ટોના રાજકીય સંગઠનમાં એ ઓળખાતો પણ એન્જિનિયર તરીકે જ. ૧૯૯૪માં ૨૮ વર્ષી બૉમ્બમેકર અય્યાશે બનાવેલા બૉમ્બે ઈઝરાયલના શહેર હાદેરાના સેન્ટ્રલ રેલવેસ્ટેશન પર માત્ર છ જણના જીવ લીધા એનાથી અય્યાશ નિરાશ થયેલો છથી શું થાય? પોતાની એન્જિનિયરિંગ વિદ્યા કામે લગાડી એણે નવો બૉમ્બ બનાવ્યો, જે એણે સાલેહ અબ્દુલ રહીમને આપી તેલ અવીવ મોકલ્યો.

નવાં ખરીદવામાં આવેલાં પેજર, વૉકીટૉકી ફાટ્યાં અને... સર્વેલન્સથી બચવા 'હેઝબુલ્લાહ'ના આતંકવાદીઓ ૧૯૯૦ના દાયકામાં લોકપ્રિય થયેલાં, સંદેશો મોકલતાં પેજર તથા વૉકીટૉકી વાપરતા, જેમાં ઈઝરાયલે બૉમ્બ ફિટ કરીને લાશો ઢાળી.