કચકડાની માયા ને વાસ્તવિકતા...

‘ધ સિમ્પ્સન્સ’: રીલ લાઈફ્ની કૉપી કરે છે રિયલ લાઈફ?

- રઘુ જેટલી

વર્ષો પહેલાં ડિરેક્ટર શશીલાલ નાયરની એક ફિલ્મ આવેલીઃ અંગાર. આ ફિલ્મમાં એવું આવે છે કે મધ્યમવર્ગી ભણેલો-ગણેલો બેરોજગાર યુવાન જેકી શ્રોફ એના મિત્રો સાથે મળીને શહેરમાં બાંધવામાં આવેલાં અનેક ગેરકાયદે ગગનચુંબી મકાનોને એકસાથે, એક જ સમયે શ્રેણીબદ્ધ બૉમ્બધડાકાથી તોડી પાડે છે. ફિલ્મ રિલીઝ થઈ એના છએક મહિનામાં જ મુંબઈમાં જીવલેણ શ્રેણીબદ્ધ બૉમ્બધડાકા થયા. તે વખતે કોઈએ આ રીલ અને રિયલ ઘટનાને સાંકળીને લેખ લખ્યાનું રઘુને સ્મરણ છે.

હવે અંગાર પિક્ચરના સિરિયલ બૉમ્બબ્લાસ્ટનું આ ક્ષણે સ્મરણ કરવાનું કારણ છે અમેરિકાનું પોલિટિક્સ. દેશના વર્તમાન પ્રમુખ ૮૧ વર્ષી જો બાઈડન ફરી વાર પ્રમુખપદ માટે ઊભા રહેવાના હતા, પણ શરીર, મન સાથ દેતાં ન હોય કે બીજું કોઈ કારણ હોય, એક સવારે બાઈડન કાકાએ જાહેર કર્યું કે નથી ખપતું પ્રમુખપદ મને બીજી વાર. એમણે વર્તમાન ઉપપ્રમુખ કમલા હેરિસને કહ્યું: આગે બઢો, મૈં તુમારે સાથ હૂં. આમ હવે સાઠ વર્ષી કમલાબહેન પ્રેસિડન્ટની રેસમાં દોડી રહ્યાં છે. સામે છે જૂના ભડભડિયા ડોનાલ્ડ ટ્રમ્પ.