શહીદોના પરિવારને સુરત પોંખે છે, અનેરી રીતથી

સરહદ પર લડવા સિપાહીઓ છે, પણ સરહદની અંદર રહીને દેશસેવાની મશાલ પણ કોઈએ તો પ્રગટાવવી જોઈએ ને? સુરતની એક સંસ્થા દેશભરના શહીદના પરિવારો માટે સેવાનું અનોખું કામ કરે છે.

- અરવિંદ ગોંડલિયા (સુરત)

અપની આઝાદી કો હમ હરગીઝ મિટા સકતે નહી, સર કટા સકતે હૈ લેકિન સર ઝૂકા સકતે નહીં....

પચ્ચીસ વર્ષથી કોઈ ને કોઈ શહીદના પરિવારને આર્થિક સહાય આપવા ઉપરાંત 'જય જવાન નારિક સમિતિ' સુરતમાં એક ફાઈટર પ્લેન અને એક ટૅન્ક લાવવામાં પણ નિમિત્ત બની છે.

મા ભોમની રક્ષા કાજે પોતાના પ્રાણની આહુતિ આપનારા દેશના વીર સપૂતોનું આ ઝનૂન હોય છે. એ હસતાં હસતાં દેશ માટે બલિદાન આપી દે છે, પરંતુ એમના પરિવારજનો માટે આ ઘડી દોહ્યલી હોય છે, ખાસ કરીને જ્યારે પરિવારમાં મુખ્ય મોભી શહીદીને વરે ત્યારે.

ગુજરાતના આવા પરિવારોનું આર્થિક સંકટ ટાળવા સંકટ મોચનના રૂપે સુરતમાં વર્ષ ૧૯૯૯માં જય જવાન નાગરિક સમિતિની રચના થઈ. આ સમિતિએ સીમા પર નહીં, પણ સરહદની અંદર રહીને દેશસેવાની મશાલ પ્રગટાવી છે. કારગિલ યુદ્ધ વખતે ગુજરાતમાં ૧૨ જવાન વીરગતી પામ્યા હતા, જેમાં મોટા ભાગના શહીદના પરિવારોની આર્થિક સ્થિતિ ખૂબ તંગ હતી. આ બારેય પરિવારને આર્થિક રીતે મદદરૂપ થવા સાથે સમિતિએ એના કાર્યનો આરંભ કર્યો અને એ પછી દર વર્ષે ૨૬ જુલાઈએ સુરતના સરદાર સ્મૃતિ ભવનમાં ગૌરવ સમર્પણ સમારોહનું આયોજન થાય છે. આ એનું રજત વર્ષ છે.