સરહદ, સૈનિક અને સેવા

ગંભીર માંદગીનું દર્દ ભૂલવા મથતાં બાળકે હૉસ્પિટલના બિછાને ચિત્રો દોર્યાં અને સૈનિકોને મળવાની જીદ પકડી. એમાંથી પાંગરી દેશપ્રેમની પ્રવૃત્તિ. તનથી પીડિત, પણ મનથી મજબૂત દિલ્હીના બાળવીર અથર્વ તિવારીના અનોખા મિશનની પ્રેરક કથા.

- મહેશ શાહ (અમદાવાદ)

કારગિલ, સિયાચીન બેઝ કૅમ્પ, ઉરી, પૂંચ, રાજૌરી, કૂપવારા, નથુ લા – સિક્કિમ) સહિત ત્રીસ જેટલા સરહદી વિસ્તારોની એણે ચારેક વર્ષમાં મુલાકાત લીધી છે. ના, એ સેનાનો ઉચ્ચ અધિકારી, રાજકીય મહાનુભાવ કે સેલિબ્રિટી નથી... અને સૈનિક સુદ્ધાં નથી. છતાંય સરહદ પર ગૌરવભેર જઈને જવાનો સાથે મુલાકાત કરીને એણે પ્રેમભર્યો આવકાર મેળવ્યો છે.

એનું નામ છે અથર્વ તિવારી. દિલ્હીનો બાર વર્ષનો અથર્વ અતૂટ દેશપ્રેમ અને સૈનિકો પ્રત્યે અદમ્ય આદરભાવથી છલોછલ છે. સાથે સહનશીલતા, સાહસ, સજ્જતા અને સંકલ્પ જેવા ગુણો એની ઉંમરથી અધિક ચડિયાતા છે.

તબીબદંપતી ક્લિનિકલ ચાઈલ્ડ સાઈકોલૉજિસ્ટ ડૉ. નિશા અને ડેન્ટલ સર્જન ડૉ. મનીષ તિવારીના પુત્ર અથર્વને બાળવયથી સૈનિક બનવાની ઈચ્છા. એ રમકડાની ગનથી રમે. સાથે ગોદડાં, ઓશીકાનું બંકર બનાવી એમાં છુપાઈને સૈનિક બનીને ટૉય ગનથી ફાયરિંગની મોજ લે.

અત્યારે હજી કિશોરવયનો હોવાથી સૈનિક બનવાનો શોખ એ ભવિષ્યમાં કદાચ પૂરો કરી શકે, પરંતુ એનામાં ભારોભાર દેશપ્રેમ વિકસ્યો ઘરને બદલે હૉસ્પિટલના બિછાને. વર્ષ ૨૦૧૭માં પાંચ વર્ષનો અથર્વ માર્શલ આર્ટ ટેક્વાન્ડોમાં ફર્સ્ટ બેલ્ટ મેળવવા પ્રેક્ટિસ કરતો હતો. એ અરસામાં અચાનક ડાબા પગમાં દુખાવો થયો. છેક ઑર્થોપેડિક સર્જનની સારવાર લીધી, પણ પીડા યથાવત્. એમઆરઆઈમાં નિદાન થયું ઓસ્ટિયોસાર્કોમા તરીકે ઓળખાતું બોન (હાડકાનું) કૅન્સર.

એ દિવસોમાં અથર્વનાં મમ્મી ડૉ. નિશા ગર્ભવતી હતાં. એમાં દીકરાને આ ગંભીર રોગ આવ્યો. જો કે પછીના દિવસોમાં અથર્વની દિલ્હીની મેક્સ હૉસ્પિટલમાં બે સર્જરી અને બાયોપ્સી થઈ. એઈમ્સ હૉસ્પિટલમાં આઠેક મહિના કિમોથેરાપી પણ ખરી. એને દવા ચડાવવા હાથમાં ટ્યૂબ લગાવી હતી. એમાં દર પંદર દિવસે ટાંકા લે ત્યારે ખૂબ દુખાવો થતો. એ આખું વર્ષ અથર્વ હૉસ્પિટલમાં રહ્યો. એ વખતે ડૉ. નિશા નવજાત દીકરી અથીરા અને બીમાર અથર્વની સંભાળ લેતાં.

છેવટે અથર્વ કૅન્સરમાંથી મહામહેનતે સાજો થયો, પરંતુ પગનો દુખાવો મટતો નહોતો. વધુ ચકાસણીમાં ડૉક્ટરનો મત થયો કે અથર્વનો ડાબો પગ કાપવો પડશે! માતા-પિતાએ હા પાડ્યા વિના છૂટકો નહોતો. આખરે ફેબ્રુઆરી, ૨૦૧૮માં એનો ડાબો પગ કાપવો પડ્યો. એ માટેની રોટેશન પ્લાસ્ટિ સર્જરી ચાલી પૂરા તેર કલાક!