ગુજરાતી ભક્તિાના સાથે ભરતનાટ્યમ

દક્ષિણની સંસ્કૃતિના પ્રભાવ હેઠળ પ્રસ્તુત થતાં ભરતનાટ્યમમાં કોઈ ગુજરાતી સંગીત-કળાને ઢાળવાની વાત કરે તો નવાઈ લાગે, પણ ગુજરાતી કળાજગતમાં આવો પડકારજનક પ્રયોગ કરીને રાજકોટનાં એક નૃત્યાંગના કરિયર બનાવવા આગળ વધી રહ્યાં છે.

- દેવેન્દ્ર જાની

એક નોકરિયાત પરિવારમાંથી આવતી દીકરીએ બિઝનેસ ઍડ્મિનિસ્ટ્રેશનના સ્નાતક તરીકે ડિગ્રી મેળવી ત્યારે કુટુંબના લોકો એને સતત કહેતા કે તું પણ પરિવારના બીજા સભ્યોની જેમ નોકરી કરીને કરિયર બનાવજે... પરંતુ આ દીકરીના મનમાં કંઈક જુદું જ રમતું હતું. એને નાનપણથી જ નૃત્ય પ્રત્યે લગાવ હોવાથી એ ડાન્સિંગમાં જ કારકિર્દી ઘડવા માગતી હતી-પ્રોફેશનલ ડાન્સર બનવા ઈચ્છતી હતી...

અને જે નિર્ધાર સુમને કર્યો હતો એ એણે સિદ્ધ પણ કર્યો. તામિલનાડુ અને કર્ણાટકમાં રહી ભરતનાટ્યમની તાલીમ લઈને આજે સુમન દક્ષિણની આ નૃત્ય સંસ્કૃતિને ગુજરાતી ટચ આપીને ગુજરાતીઓ સુધી સરળ રીતે પહોંચાડવાના લક્ષ્ય સાથે આગળ વધી રહી છે.

અમદાવાદમાં થોડા સમય અગાઉ યોજાયેલા એક કાર્યક્રમમાં રાજકોટનાં સુમન ઉપાધ્યાયને પ્રાઈડ ઑફ ગુજરાત-ડિવાઈન ભરતનાટ્યમ ડાન્સર ઑફ ગુજરાતના ટાઈટલથી નવાજવામાં આવ્યાં ત્યારે તાળીના ગડગડાટથી હૉલ ગુંજી ઊઠ્યો. ભરતનાટ્યમ જેવા શાસ્ત્રીય નૃત્ય સાથે ભાષા, કર્ણાટકી સંગીત અને વિવિધ મુદ્રાનું ખાસ મહત્ત્વ હોય છે. આ ભરતનાટ્યમ નૃત્યની આરાધના આસાન નથી.

અહીં વાત કરવી છે ભરતનાટ્યમનું મૂળ સ્વરૂપ જાળવી રાખીને આ નૃત્યને ગુજરાતી લોકો વચ્ચે સરળ રીતે પ્રસ્તુત કરવા જેમણે કમર કસી છે એવાં એક ગુજરાતી નૃત્યાંગનાની. રાજકોટનાં આ દીકરીએ પોતાની કરિયરને નૃત્ય સાથે જોડીને લાંબો સમય ચેન્નઈ અને બેંગલુરુમાં ગુરુ-શિષ્યની પરંપરાથી ભરતનાટ્યમની તાલીમ લીધી છે.