ભાવનગર-જામનગરની તાસીર છે નિરાળી...

સૌરાષ્ટ્રના અંતરિયાળ વિસ્તારો સુધી નાટકો પહોંચતાં નથી અને મનોરંજનના બીજા વિકલ્પો મળી રહેતાં લોકો એ તરફ વળે એ સાહજિક છે.

- જયેશ દવે (ભાવનગર) । પાર્થ સુખપરિયા (જામનગર)

ભાવનગર એટલે કળા-સંસ્કૃતિની નગરી. રંગભૂમિની વાત કરીએ તો, અહીં વ્યાવસાયિક કરતાં નિજાનંદ માટે કળાપ્રવૃત્તિ વધુ થતી. હવે નવી પેઢી નિજાનંદની સાથે વ્યાવસાયિક ધોરણને ધ્યાનમાં લઈને આગળ વધી રહી છે. આનું ઉદાહરણ છે શહેરની નાટ્યસંસ્થા વિવેક પાઠક પ્રોડક્શનનું નાટક ભણકારા. ભાવનગરના વાર્તાકાર શક્તિસિંહ પરમારે લખેલી વાર્તા ઓઘરાળા પરથી વિવેક પાઠકે તૈયાર કરેલા પ્રથમ ફુલ લેન્થ નાટક ભણકારાએ મુંબઈમાં ભવન્સ કલ્ચરલ સેન્ટર-અંધેરી આયોજિત નાટ્યસ્પર્ધામાં પાંચ એવૉર્ડ મેળવ્યા. નાટકની સમગ્ર ટીમ ભાવનગરની છે. આ ઘટના જ સૂચવે છે કે કળા-સંસ્કૃતિ નગરીની રંગભૂમિ નવી પેઢી દ્વારા હજી જીવંત છે.