મહાશિવરાત્રિએ કરો દર્શન આ અનોખા શિવમંદિરનાં

ૐ નાદથી પૃથ્વીની ઉત્પત્તિ થઈ હોવાનું કહેવાય છે. સકળ વિશ્વ માં જ સમાયેલું છે. યોગમાં પણ ૐ મંત્રનો ખૂબ મહિમા છે. વિશ્વઆખામાં ૐની મહત્તા સાબિત થઈ ચૂકી છે ત્યારે ગુજરાત-મહારાષ્ટ્રના સીમાડે સેલવાસમાં ૐ આકારનું એક ભવ્ય મંદિર આકાર પામ્યું છે. થોડા દિવસ અગાઉ એનો પ્રાણપ્રતિષ્ઠા મહોત્સવ થયો એ નિમિત્તે સાડા બાર એકરમાં ફેલાયેલા આ મંદિરની આધ્યાત્મિક સફર તો કરવી જ પડે. તો હર હર મહાદેવના નાદ સાથે આવી જાઓ સેલવાસ.

-  અરવિંદ ગોંડલિયા

સુંદર ઉદ્યાનો, નદીનો રમણીય કિનારો અને ખુશનુમા વાતાવરણ માટે સેલવાસ સુવિખ્યાત છે. ગયા મહિને આ સૌરભમાં અધ્યાત્મનું એક નવું પુષ્પ ઉમેરાયું છે, જે ખીલ્યું છે ખળખળ વહેતી દમણગંગા નદીના તટે કુડાચા ગામે. સેલવાસનો શહેરી વિસ્તાર પાર કરીને ૧૦ કિલોમીટર દૂર પ્રકૃતિના સાંનિધ્યમાં ૐૐ આકારનું મંદિર શોભી રહ્યું છે. દૂરથી જ મંદિરની ધજા શ્રદ્ધાળુને શિવજીની સમીપ ખેંચી લાવે છે. આ મંદિર છે શ્રી નિખિલેશ્વર મહાદેવ મંદિર.

ૐ આકારમાં જ મંદિર કેમ?

મંદિરના સંચાલક સિદ્ધાશ્રમસાધક પરિવારના પ્રવીણભાઈ પટેલ (પી.જે. પટેલ) કહે છેઃ ‘મારા ગુરુદેવ નિખિલેશ્વરાનંદજી કહેતા કે એવી સેવા કરો કે ઈતિહાસ તમારી નોંધ લે. ૐૐ આકારનું શ્રી નિખિલેશ્વર મહાદેવ મંદિર માત્ર સાક્ષીભાવથી બનાવ્યું છે. ગુરુ નિખિલેશ્વરાનંદની પ્રેરણા અને આશીર્વાદ જ મંદિરનિર્માણ માટે મુખ્ય પરિબળ છે. વિશ્વકર્મારૂપમાં ગુરુદેવે આ પ્રેરણા આપી અને એમના પ્રતાપે જ આ કાર્ય પાર પડ્યું છે. આ મંદિરનો તખ્તો તો છેક ૧૯૯૬માં ઘડાયો. અમે શંકરાચાર્યજીની અધ્યાત્મ શિબિરમાં બેઠા હતા, જ્યાં એ શંકર ભાષ્યના શ્લોકની પરિભાષા સમજાવતા હતા. એમણે કહ્યું કે જેટલા અઢી અક્ષરના શબ્દો તુચ્છ છે અને એમાં શિષ્ય શબ્દ સૌથી વધુ તુચ્છ છે. પછી એમણે નિખિલેશ્વરાનંદજી સામે તાકીને પૂછ્યું: નારાયણ (નિખિલેશ્વરાનંદજીનું સંસારી નામ), તને કોઈ શિષ્ય મળ્યા?’