હસ્તલેખનઃ કૌશલ જ નહીં, કસરત પણ!

આજના ડિજિટલ યુગમાં અનેક જૂની બાબતની જેમ હાથથી લખવાનો મહાવરો ઘટવા લાગ્યો છે, પણ મનોવિજ્ઞાનીઓ સૂચવી રહ્યા છે કે ટાઈપિંગને બદલે હાથે લખાતા શબ્દો મગજને વધુ ઉપકારક છે.

-  ઉમંગ વોરા

આપણે ત્યાં મોટા ભાગની શાળામાં સુલેખન અને ઝડપી થ્રુતલેખન (સાંભળીને લખવા) માટેની સ્પર્ધા યોજાતી રહી છે. આ સ્પર્ધાના બહાને વિદ્યાર્થીઓ સારા અક્ષરો કાઢવાની અને ઝડપથી લખી શકવાની ક્ષમતા કેળવવા મથે એવો એ સ્પર્ધાનો ઉદ્દેશ્ય. એવા જ હેતુથી અગાઉ રોજેરોજ ડાયરીલેખન માટે પણ બાળકોને ખૂબ પ્રોત્સાહિત કરવામાં આવતાં.

સમાજમાં દરેક ક્ષેત્રમાં, એમાંય બૅન્કિંગ જેવાં અને હિસાબી કારોબાર ધરાવતાં ક્ષેત્રોમાં તો સારા અક્ષરો ધરાવતા લોકો હંમેશાં ડિમાન્ડમાં રહેતા.આજે પણ સારા અક્ષરોની કદર થાય છે, પણ સ્વાભાવિક રીતે પહેલાં જેટલી નહીં. બીજી તરફ, સ્કૂલોમાં પણ બાળકો ડાયરીલેખન જેવી લખવાની આદત કેળવે કે સારા અક્ષરો માટે મહેનત કરે એ તરફનું ધ્યાન (બીજાં દબાણોને લીધે) ઓછું થયું છે.