ફોનમાં ઘૂસી જતા જતા જાસૂસને સમયસર ઓળખી લેજો...

તમારી પર કોઈ નજર રાખી રહ્યું છે એ કઈ રીતે જાણશો? શું છે એનાથી બચવાના ઉપાય?

- પુનીત આચાર્ય સોમપુરા

તમારા ફોન મારફતે તમારી જ જાસૂસી કરવામાં વળી કોને રસ પડે? આવી નવાઈ જો તમને લાગતી હોય તો સમજી લેજો કે તમારી જાસૂસી કરવામાં તમારા સ્પર્ધકોથી શરૂ કરીને તમારા દુશ્મનો અને એનાથી પણ આગળ જઈએ તો સાઈબર હુમલાખોરો સુધીનાઓને ખૂબ જ રસ હોય છે... અને જો કદાચ તમે કોઈ શંકાસ્પદ કામ સાથે જોડાયેલા હશો તો સરકારી તંત્રને પણ નાછૂટકે તમારી જાસૂસી કરવાની જરૂર પડે છે.

અત્યારના જમાનામાં જાસૂસી કરવી પ્રમાણમાં સાવ સરળ છે. આની માટે વપરાય છે, સ્પાયવેર. આ એક એવો નાનકડો પ્રોગ્રામ હોય છે કે જે તમારા મોબાઈલમાં પ્રવેશ કરીને તમારી રજેરજની માહિતી ખુલ્લી પાડી શકે છે.

જો તમારા ફોનમાં નીચે મુજબનાં લક્ષણ દેખાય તો ચેતી જજો..

તમારા ફોનમાં સ્પાયવેર ઘૂસી જાય છે ત્યારે કોઈ દેખીતા કારણ વગર ફોન સ્લો પડી જાય, બૅટરી ઝડપથી ઊતરી જાય, ઍપ્સમાં સામાન્ય રીતે આવતી હોય એનાથી અનેક ગણી જાહેરાત આવે અને અમુક ઍપ્સ વારંવાર ક્રેશ થવા જેવાં લક્ષણ તમારા ફોનમાં દેખાવાનું શરૂ થઈ જશે.

અને તમે આવાં લક્ષણોનો સામનો કરી રહ્યા હો છો એ દરમિયાન સ્પાયવેર પોતે ભેગી કરેલી તમારી ઝીણવટભરી માહિતી પોતાના બૉલોકોને મોકલવામાં મશગૂલ હોય છે એટલે જ્યારે પણ મોબાઈલ આવી રીતે વર્તવાનું શરૂ કરે ત્યારે તમારે તત્કાલ ચેતવું ખૂબ જ આવશ્યક છે.