તમે કપડાં ધુઓ છો કે મશીન?

ધોકા મારી મારીને કપડાં ધોવાની મહેનતમાંથી બચાવતા વૉશિંગ મશીનની આ રીતે લેવી કાળજી

- વિશ્વા મોડાસિયા

આજે શહેરોમાં લગભગ દરેક ઘરમાં વૉશિંગ મશીન જોવા મળે. કપડાં  ધોવાનું કામ આ મશીને ખૂબ સરળ બનાવી દીધું છે. વર્ષો અગાઉ આપણે ત્યાં આઈસક્રીમ બનાવવાના સંચા આવતા, કંઈક એવા જ આકારનાં કપડાં ધોવાનાં મશીન પણ આવતાં, જેનું હૅન્ડલ હાથેથી ફેરવી કપડાંને ગોળ ગોળ ફેરવી એમાંથી મેલ કાઢવામાં આવતો. હવે તો ફુલ્લી ઑટોમેટિક મશીન આવી ગયાં છે અને એમાં પણ ફ્રન્ટ લોડ તથા ટૉપ લોડ જેવા વિકલ્પ મળે છે.

આ મશીન ગૃહિણીનો સમય અને મહેનત બચાવે છે, પરંતુ મશીનને મેઈન્ટેન કરવાની વાત આવે ત્યારે ક્યારેક ગૃહિણી માટે તકલીફ ઊભી થાય છે. જો કે અમુક તકેદારી લો અને અહીં આપેલી ટિપ્સનો ઉપયોગ કરો તો મશીનને લાંબા ગાળા સુધી ટનાટન રાખી શકો છો.

સૌપ્રથમ તો વૉશિંગ મશીનમાં કપડાં નાખતાં પહેલાં કૅટેગરી પ્રમાણે અલગ કરો એટલે કે ઓછાં મેલાં કપડાં અલગ રાખો, વધુ મેલાં અને હઠીલા ડાઘવાળાં કપડાં અલગ રાખો કપડાં પણ અલગ રાખો. વિવિધ પ્રકારનાં કપડાં (જેમ કે જીન્સ, વૂલન, ચાદર, બેડશીટ, વગેરે) મશીનમાં આપેલા મોડ પ્રમાણે સેટ કરીને નાખવાં જોઈએ.