સદીયોં કી પ્રતીક્ષા કે બાદ, હમારે રામ આ ગયે…

એક-એક શબ્દ છૂટો પાડીને, અત્યંત ગંભીરતાથી ઉદ્ઘોષાયેલું વડા પ્રધાન નરેન્દ્ર મોદીનું આ કથન સાંભળીને રામમંદિરમાં ઉપસ્થિત ૭૫૦૦થી વધુ મહેમાનોનાં જ નહીં, પણ ભારત1-દુનિયાભરના કરોડો હિંદુઓનાં હૃદય અને ચક્ષુ બન્ને ભીનાં થઈ ગયાં. અભૂતપૂર્વ પ્લાનિંગ અને શ્રેષ્ઠ અમલીકરણ સાથે સંપન્ન થયેલી રામલલ્લાની પ્રાણપ્રતિષ્ઠા બાદ અયોધ્યા નગરી વિશ્વનું ટોચનું ટૂરિસ્ટ ડેસ્ટિનેશન અને ભારતની સર્વોચ્ચ સાંસ્કૃતિક રાજધાની બની જાય એ દિવસ દૂર નથી.

- અર્ચના મિશ્રા (અયોધ્યા) સમીર પાલેજા (મુંબઈ)

કડકડતી ટાઢમાં પણ બાવીસ જાન્યુઆરીની સવારના આઠ વાગ્યાથી પ્રાણપ્રતિષ્ઠા સમારોહમાં ભાગ લેવા માટે ૭૫૦૦ જેટલા આમંત્રિત મહેમાનો એક પછી એક આવવા માંડ્યા ત્યારે પાંચેક હજાર સેવકો અને સુરક્ષાકર્મીઓ એકદમ સચેત હતા. પહેલાં તો રામનામ લખેલો ખેસ પહેરાવીને મહેમાનોનું સમ્માન કરવામાં આવ્યું. એમને મેટલનો દીવો અને અયોધ્યાની માહિતી પુસ્તિકા પણ આપવામાં આવી. અતિથિઓનાં જૂતાં સાચવવાની ખાસ વ્યવસ્થા હતી. વૃદ્ધ અને અશક્ત ગેસ્ટ્સનાં જૂતાં કાઢવા-પહેરાવવાનું કામ સેવકો નિષ્ઠાથી કરી આપતા હતા. દરેક મહેમાનને એમની બેઠક સુધી દોરી જવા માટે સ્વયંસેવકોની ફોજ ઉત્સાહ થી કાર્યરત હતી.

દિલ્હીની સંગીત નાટક અકાદમીના ત્રીસેક કલાકારોએ દેશનાં અનેક રાજ્યોમાંથી મગાવાયેલાં વાજિંત્રોના સથવારે રામકીર્તન કર્યાં ત્યારે માહોલ અલૌકિક બની ગયો. બોલીવૂડનાં સિંગર સોનુ નિગમ, અનુરાધા પોડવાલ અને શંકર મહાદેવને પણ કર્ણપ્રિય સ્વરમાં ભજનો રજૂ કર્યાં.

રામલલ્લાની પ્રાણપ્રતિષ્ઠાની પાંચ મુખ્ય વિધિ આદિગુરુ રામાનંદાચાર્ય તથા નારદ મુનિની પરંપરામાં પાર પાડવામાં આશરે એક કલાક થયો હતો .

બપોરે ૧૨:૧૦ વાગ્યે શરૂ થયેલી વિધિ ૧:૦૫ વાગ્યે સંપન્ન થઈ હતી. મુખ્ય અનુષ્ઠાન ૧૨:૨૯થી ૮૪ સેકન્ડ માટે અભિજિત મુહૂર્તમાં કરવામાં આવ્યું.

આ વિધિ સંપન્ન થતાં જ મહેમાનોની પહેલી હરોળમાં બેઠેલાં સાધ્વી ઋતંભરા અને ઉમા ભારતી કૂદીને એકમેકને ભેટીને ચોધાર આંસુએ રડી પડ્યાં.રામજન્મભૂમિની જનજાગૃતિ ઝુંબેશમાં આગઝરતાં ભાષણો થકી લોકોને પાનો ચઢાવનારાં આ બે સાધ્વીએ એમનું જીવનધ્યેય પૂરું થયું હોવાનું અનુભવ્યું.