આ માણસ ભાજપ માટે આટલો અનિવાર્ય હતો?

ઉત્તર પ્રદેશના માથાભારે સંસદસભ્ય અને ભારતીય કુસ્તી સંઘના સર્વેસર્વા એવા બ્રિજભૂષણ શરણ સિંહ સામેના આંદોલનને એક વરસ થવા આવ્યું ત્યારે એને ગડગડિયું આપવા પાછળ દેખીતું કારણ છે, પણ એને અત્યાર સુધી કેમ સાંખી લેવામાં આવ્યો?

- હીરેન મહેતા

ભારે વિલંબ બાદ કે મોડે મોડે મળતો ન્યાય એ ન્યાય ન મળવા બરાબર છે. ભાજપના મહાભારાડી સંસદસભ્ય અને ભારતીય કુસ્તી સંઘના ભૂતપૂર્વ પ્રમુખ બ્રિજભૂષણ શરણ સિંહ સામે જંગે ચડેલા દેશના ટોચના કુસ્તીબાજો માટે આમ જ કહી શકાય એમ છે. પૂરા બાર મહિના આ ખેલાડીઓ બ્રિજભૂષણની જોહુકમી સામે અવાજ ઉઠાવતા રહ્યા, પણ એ સમયે કેન્દ્ર સરકારને કે ભારતીય જનતા પક્ષને કાને એમનો અવાજ પડ્યો જ નહીં. હવે છેક આટલા વખતે સરકારે હમણાં ચૂંટાઈ આવેલી કુસ્તી સંઘની નવી કારોબારીને બરખાસ્ત કરી માથે ચડેલા બ્રિજભૂષણને ખાળવાનો પ્રયાસ કર્યો છે. એ પણ ઑલિમ્પિક્સ મેડલ વિજેતા કુસ્તીબાજ સાક્ષી મલિકે આ રમતમાંથી પોતાની નિવૃત્તિ ઘોષિત કરી દીધી અને રાષ્ટ્રસમૂહ ખેલના મેડલ વિજેતા બજરંગ પુનિયાએ એને મળેલો પદ્મશ્રી એવૉર્ડ વડા પ્રધાન નરેન્દ્ર મોદીના ઘર બહાર, સડક પર મૂકી દીધો એ પછી!

એના વળતા દિવસે ભાજપને આખા પ્રકરણની ગંભીરતા સમજાઈ હોય એમ મદમસ્ત માતંગ જેવા બ્રિજભૂષણ શરણ સિંહને ખેલ સંગઠનથી છેડો ફાડી નાખવાની સૂચના મળી. પક્ષપ્રમુખ જયપ્રકાશ નડ્ડાને મળ્યા પછી તો બ્રિજભૂષણે જાણે મોક્ષના માર્ગે નીકળ્યો હોય એવી વાત કરી.

ખરેખર તો આ કામ ગયા જાન્યુઆરી મહિનામાં કરવાની જરૂર હતી. દેશની એક-બે નહીં, પણ પૂરી ૧૯ મહિલા કુસ્તીબાજોએ કુસ્તી સંઘના તત્કાલીન પ્રમુખ બ્રિજભૂષણ સામે જાતીય સતામણીના આક્ષેપ કર્યા હતા, પરંતુ એ આક્ષેપ સામે આંખ આડા કાન કરવામાં આવ્યા. ખેલકૂદ મંત્રાલય દ્વારા કુસ્તીબાજોના આંદોલનની સદંતર અવગણના કરવામાં આવી. બ્રિજભૂષણ સામે તપાસ યોજવાને બદલે મહિલા કુસ્તીબાજોને એમની ફરિયાદ પાછી ખેંચી લેવા દબાણ કરવામાં આવ્યું. ૧૯માંથી બારેક કુસ્તીબાજોને કોઈક રીતે શાંત પાડી દેવામાં આવી. આંદોલન નબળું પડ્યું એ પછી સરકાર તરફથી બ્રિજભૂષણ સામે નક્કર પગલાંની ખાતરી મળી એટલે જંગમાં બાકી રહેલા ખેલાડીઓએ આંદોલન પાછું ખેંચી લીધું.