શિયાળામાં શરીરના આ હિસ્સાને પણ ભૂલતા નહીં...

ઠંડી એટલે તબિયત બનાવવાની ઋતુ, પરંતુ એ માટે અમુક ‘ગુપ્ત’ માહિતી ધ્યાનમાં રાખવા જેવી ખરી.

- ડૉ. અર્ચના પારસ શાહ

ગ્લોબલ વૉર્મિંગની અસર ગણો કે બીજું કંઈ, ઋતુચક્રમાં જબરા ગોટાળા થઈ રહ્યા છે. અત્યારે જ જુઓને, અડધો ડિસેમ્બર પૂરો થયો, પણ હજી જોઈએ એટલી ઠંડી જામી નથી. ખેર, મોડ મોડ પણ શિયાળો જામશે ખરો.

આમ તો શિયાળો એ તબિયત બનાવવાની ઋતુ ગણાય અને ઘણાખરા લોકો પણ આ સીઝનમાં એ માટે પૂરતી તકેદારી લે છે. મોટા ભાગની મહિલાઓ પણ શિયાળા દરમિયાન એમના બાહ્યશરીર અને ત્વચાની ખૂબ કાળજી લે છે. જો કે ઠંડીની ઋતુમાં જેમ આપણે આપણી બાહ્યત્વચા ની સંભાળ લઈએ છીએ એવી જ કાળજી આપણે અત્યંત કોમળ અને સંવેદનશીલ એવા આપણા પ્રાઈવેટ પાર્ટ્સ માટે પણ લેવી જરૂરી છે.

શિયાળામાં મહિલાઓએ પોતાના આરોગ્યની જાળવણી કેવી રીતે કરવી એ જાણીએ..

વધુપડતી સુગંધિત બાથ પ્રોડક્ટ્સનો ઉપયોગ ટાળોઃ તમારા પ્રાઈવેટ પાર્ટ્સને સ્વચ્છ અને સૂકા રાખવા જરૂરી છે. ખાસ તો શિયાળા દરમિયાન તમને ભીનાશનો અનુભવ થવાની શક્યતા વધી જાય છે.

સુગંધિત ઉત્પાદનો વજાઈનલ પીએચ સંતુલનને અનિયમિત બનાવી તમારા વજાઈનાની તંદુરસ્તી પર પણ અસર કરી શકે છે. હંમેશાં કુદરતી અને બિનસુગંધિત બાથ પ્રોડક્ટ્સનો ઉપયોગ કરવો જોઈએ. તમારા પ્રાઈવેટ પાર્ટ્સને દરરોજ હળવા, પીએચ સંતુલિત સાબુ અને પાણી વડે સાફ કરવાનું રાખો અને સ્નાન પછી એને સંપૂર્ણપણે સૂકા કરો.