ટેરેસ ગાર્ડનની આમ પણ થાય સજાવટ

અગાસીના બગીચાને સુંદર મજાનું વિરામસ્થળ બનાવવા પ્લાન્ટ્સ ઉપરાંત બીજી ઘણી સામગ્રીની જરૂર પડે છે.

- પૂર્વી શાહ

ગાર્ડન મેજિક્ની કૉલમમાં વાંચ્યું એમ તમે ટેરેસને એક સુંદર મજાના ગાર્ડનમાં કન્વર્ટ કરો છો તો સાથે સાથે અફલાતૂન બેઠકવ્યવસ્થા તો હોવી જ જોઈએ ને? વળી, અગાસી પ્રમાણમાં મોટી હોય તો એકાદો હીંચકો ગોઠવી જ શકાય. રિસાઈકલ પ્લાસ્ટિકની બેન્ચીઝ, લાકડાંના થડમાંથી બનાવેલાં મુંડાં, વગેરે પણ યોગ્ય સ્થાને મૂકી શકો.

ઘણા લોકો ટેરેસ પર ગઝીબો બનાવે છે. એમાં બેઠક તરીકે સોફાસેટ, વગેરે ગોઠવી શકીએ. છત પરના બગીચામાં પક્ષીસૃષ્ટિને આવકારવાથી છોડમાં લાગતા કીટકનો ઉપદ્રવ ઓછો થશે. પંખીડાંને આકર્ષવા માટે હૅન્ચિંગ બર્ડફીડર લગાડી શકો છો. પંખીના માળા સ્વરૂપના આવા સુંદર મજાના આર્ટફેક્ટ્સ તમારા ટેરેસ ગાર્ડનને એક્ઝોટિક બનાવશે એ ચોક્કસ.

ક્રિપર્સ અર્થાત્ વેલવર્ગની વનસ્પતિ હંમેશાં ટેરેસ ગાર્ડનનો લુક નિખારે છે. વેલ ચઢાવવા માટે કોઈ સ્થાયી ટ્રેલિસ (જાળીવાળું ચોકઠું) જેવા સ્ટ્રક્ચરની જરૂર પડે. એ માટે બાંબુ, મેટલ, ગમે એનો મંડપ બનાવી શકો. ઘણા લોકો પીવીસી પાઈપની ટ્રેલિસ બનાવીને વેલ ચઢાવે છે. હવે તો એવા પાઈપ પણ મળે છે, જે નૅચરલ વૂડનો લુક આપે છે.