ક્રાઈમ કાલ મેઘાસવ બન્યો કાળ

કેફિન ધરાવતાં કફ સિરપ ગટગટાવીને ઘણા લોકો નશો કર્યાનો સંતોષ મેળવે છે. એ સામે નિર્દોષ ગણાતી આયુર્વેદિક દવામાં કેમિકલ અથવા તો આલ્કોહોલ ભેળવીને કોઈ વેચે અને એ પીવાથી કોઈનું મોત નીપજે તો? ગુજરાતમાં હમણાં આવો એક કિસ્સો બન્યો ત્યારે ખબર પડી કે આ કારસ્તાન તો ક્યારનું ચાલી રહ્યું હતું.

- મહેશ શાહ

કાલ મેઘાસવ નામની આયુર્વેદિક દવા ગુજરાતમાં અત્યારે ભારે ચર્ચામાં  છે. એનો ઉપયોગ શ્વાસની તકલીફ મટાડવા થાય, પરંતુ આઘાતજનક ગણો તો ખેડા જિલ્લાનાં ગામોમાં મેઘાસવ પીનારા છ જણના શ્વાસ કાયમ માટે બંધ થઈ ગયા! chitrate આયુર્વેદ દવા મુખ્યત્વે ચૂર્ણ, ભસ્મ, ગોળી, આસવ, સૂરા, વગેરે સ્વરૂપમાં મળે. એમાં આસવ અરિષ્ઠ શ્વાસની તકલીફ મટાડતું પ્રવાહી છે, એની એક બ્રાન્ડ છેઃ કાલ મેઘાસવ.

આસવ અરિષ્ઠની ખાસિયત એ કે એને બનાવવામાં ફર્મેન્ટેશન થવાથી કુદરતી રીતે ૧૨ ટકા સુધી મિથાઈલ આલ્કોહોલ બને એટલે એને સેલ્ફ જનરેટેડ આલ્કોહોલયુક્ત આયુર્વેદિક દવા પણ કહેવામાં આવે છે. જો કે આસવના અમુક ઉત્પાદકો એને કેફી કે નશાકારક પીણું બનાવવા અને પીનારાને આસવના બંધાણી બનાવવા આસવમાં આલ્કોહોલનું પ્રમાણ વધુ રાખતા કે અન્ય કેમિકલ ભેળવતા હોવાનું ચર્ચાય છે. ટૂંકમાં, આસવ પીનારી વ્યક્તિ દારૂ પીધા જેવો નશો કે કિક અનુભવે.

ખાસ જાણી લો કે આસવમાં ૧૨ ટકાથી વધુ મિથાઈલ હોય તો પીનારની આંખે અંધાપો આવી શકે, છાતીમાં દુખાવો થાય અને કોઈક સંજોગોમાં મૃત્યુ પણ થઈ શકે. ખેડાનાં અમુક ગામોની પાન કે કરિયાણાની દુકાનમાં ૩૭૫ મિલીલિટરની આસવ બૉટલ ૧૩૦ રૂપિયામાં વેચાતી. એ પીનારામાંથી છ જણનાં મૃત્યુથી વિવાદ જાગ્યો છે.

દેવ દિવાળીની આગલી સાંજે નડિયાદ પાસેના બિલોદરા ગામના યુવાન અશોક સોઢાએ ગામની દુકાનમાંથી મેઘાસવ લઈને કોલ્ડ ડ્રિન્કની જેમ આખી બૉટલ પીધું. વાસ્તવમાં દરદીએ આસવની બે ચમચી પીવાની હોય, પરંતુ નશો કરનારા આખી બૉટલ ગટગટાવી જાય. અશોકને ઘેર ગયાના અમુક કલાકો બાદ આંખે અંધારાં આવ્યાં અને પેટમાં અસહ્ય દુખાવો થયો એટલે હૉસ્પિટલ લઈ જવામાં આવ્યો, જ્યાં એણે દમ તોડ્યો.

એ પછી ગામના નટુ સોઢા અને અર્જુન સોઢા તથા વડદલા અને બગડુ ગામવાસી સાળા (મિતેશ ચૌહાણ) બનેવી (અલ્પેશ સોઢા) અને સોજાલી ગામના વિપુલ સોઢા એમ કુલ છ જણ નશાકારક આયુર્વેદિક દવા પીવાથી મૃત્યુ પામ્યા. એમાંથી નટુભાઈના પોસ્ટમૉર્ટમ રિપોર્ટમાં મેવાસવમાં મિથાઈલ આલ્કોહોલ હોવાનું જણાયું.