આ તાલુકામાં સ્ત્રી અનામતની જરૂર જ નથી...

કારણ કે અહીં તો બધા જ ટોચના હોદ્દે મહિલા જ મહિલા છે.

- 

ખારા રણમાં મીઠું પકવતા અગરિયાની વાત નીકળે એટલે સૌથી પહેલાં ખારાઘોડા ગામનું નામ જીભે આવે. અંગ્રેજોના શાસનથી આ વિસ્તારમાં મીઠું પકવવામાં આવી રહ્યું છે. સુરેન્દ્રનગરના પાટડી તાલુકાનું આ ગામ છે. ગુજરાતમાં સૌથી વધુ મીઠાનું ઉત્પાદન પાટડી તાલુકામાં થાય છે. આ તાલુકાની બીજી એક ઓળખ છે ઘુડખર અભયારણ્ય અને કચ્છના નાના રણ સાથે જોડાયેલો પ્રદેશ. જો કે આ અંતરિયાળ તાલુકાએ ગુજરાતને હમણાં વિશેષ ગૌરવ અપાવ્યું છે.

અહીં વાત મીઠાના ઉત્પાદન કે ઘુડખર અભયારણ્યની નથી કરવી. અહીં તો નારીશક્તિના ગૌરવની વાત છે. તમામ વિધાનસભા અને લોકસભામાં સ્ત્રીઓ માટે ૩૩ ટકા બેઠક અનામત રાખવાને લગતો ખરડો સંસદનાં બન્ને ગૃહોમાં પસાર થયા બાદ દેશભરમાં સત્તામાં નારીની ભાગીદારીની અત્યારે ચર્ચા ચાલી રહી છે ત્યારે યોગાનુયોગ પાટડી-દસાડા તાલુકામાં સત્તાનો સંપૂર્ણ દોર નારીશક્તિ પાસે છે. હા, અત્યારે સંયોગ એવા સર્જાયા કે આ તાલુકામાં તમામ મુખ્ય હોદ્દા પર અધિકારી ઓ છે અને મહત્ત્વના પદાધિકારી તરીકે પણ સ્ત્રીઓ બિરાજે છે. પાટડી પાલિકાના પ્રમુખ, તાલુકા પંચાયતપ્રમુખ, કારોબારી ચૅરમૅન, પ્રાંત અધિકારી, મામલતદાર, તાલુકા વિકાસ અધિકારી, પોલીસ અધિકારી, શિક્ષણ, આરોગ્ય સહિતના મહત્ત્વના હોદ્દા પર મહિલા ફરજ બજાવી રહ્યાં છે આમ આખા તાલુકાની બાગડોર મહિલાઓના હાથમાં છે.