ખરી કમાઈ શ્રમ-સ્વાવલંબન અને પૈસાના મૂલ્યની

સંકોચ વાર કરો મહેનતઃ ‘ખરી કમાઈ’નો આ છે મંત્ર.

- 

ભાવનગરના જોગર્સ પાર્ક પાસે એક ટેબલ પર જામનગરના પ્રખ્યાત તીખા ઘૂઘરા, ચટણી, સિંગ, સેવના ડબ્બા લઈને સાતમા-આઠમા ધોરણમાં ભણતો એક છોકરો ઊભો છે. આ જ રીતે વાઘાવાડી રોડ પર આવો જ એક કિશોર પાંઉ-ગાંઠિયા, ચટણીના ડબ્બા અને પૅકેટ લઈને ઊભો છે. આ છોકરાઓએ સ્કાર્ફ અને કૅપ સાથેનો યુનિફૉર્મ પહેર્યો છે અને કોઈ જ સંકોચ વગર નાસ્તાની ડિશ બનાવીને ગ્રાહકોને આપે છે. નાસ્તો કરી લીધા પછી ગ્રાહકોની ડિશની સફાઈ પણ એ કરે છે અને હિસાબ પણ પોતે જ રાખે છે. આ એમની મજબૂરી નથી, પરંતુ જાતે કમાણી કરતાં શીખવા માટે સ્વીકારેલું કામ છે.

થોડા દિવસ અગાઉ ભાવનગરમાં આવાં ૬૦૦ બાળકોએ એક અઠવાડિયા સુધી જાતમહેનત દ્વારા કમાઈ કરી. આ છે કોઈ જ કામની શરમ કે શ્રમથી મોં ફેરવ્યા વગર કરેલી ખરી કમાઈ!