થોડા શરીફ, થોડા બદમાશ

સો ટકાની પૂર્ણતા સંભવ નથી, એ ક્રમ મુજબ મારી અંદરનો શરીફ પણ, દસ ટકા બદમાશ છે. - સુરેશ પરમાર ‘સૂર’

- હિતેન આનંદપરા

અહીં સર્વગુણસંપન્ન કોઈ નથી. સ્વયં અ ભગવાને પણ મનુષ્ય અવતાર લીધો ત્યારે એ સો ટકાની ટકાવારી હાંસલ નથી કરી શક્યા. પારાવાર પ્રીતિ હોવા છતાં મર્યાદાપુરુષોત્તમ રામે જીવનસંગિની સીતા પ્રત્યે કરેલો સંદેહ આજે પણ અનેક સંશય ઊભા કરે છે. કૃષ્ણની લીલા તો એવી છે કે અવારનવાર ધર્મ-અધર્મ વિશે પ્રારંભિક કક્ષાના અનેક સવાલો આપણા મનમાં ઉદ્ભવે. પછી ઊંડે ઊંડે ઊતરતા જઈએ ત્યારે થોડુંઘણું સમજાય તો સમજાય.

સતયુગમાં જીવનારો માણસ પણ સર્વગુણસંપન્ન નહોતો. કળિયુગના માણસ વિશે તો સર્વઅવગુણસંપન્ન જેવો કોઈ શબ્દ વપરાય તો ખોટું ન લાગવું જોઈએ. ઘરઘરાઉ હિંસાથી લઈને વૈશ્વિક ધોરણે ધર્મના નામે ખેલાતાં પ્રત્યક્ષ કે પરોક્ષ યુદ્ધોનો અભ્યાસ કરીએ તો આ સાચું લાગશે.