અમરેલીને ફરી મળશે રજવાડી ઓળખ

આશરે ૧૩૦ વર્ષથી અમરેલીની મધ્યમાં ઊભો થયેલો સ્થાપત્યકળાના ઉત્તમ નમૂના સમો રાજમહેલ કાલાંતરે બિસમાર બની ગયો હતો. હવે એના નવનિર્માણની યોજના આકાર લઈ રહી છે.

- દેવેન્દ્ર જાની (અમરેલી)

ધૂળિયા શહેર તરીકે ઓળખાતા અલબેલા અમરેલીએ વિવિધ પક્ષના અનેક નેતા, કવિ, સાહિત્યકાર આપ્યા છે એ તો સૌ જાણે છે, પણ શું તમે એ જાણો છો ખરા કે સૌરાષ્ટ્રનું આ શહેર એક સમયે વડોદરાના ગાયકવાડ સ્ટેટનો હિસ્સો હતું? અલબત્ત, રાજાશાહી તો જતી રહી, પરંતુ અમરેલીવાસીઓ આજે પણ ગાયકવાડ સ્ટેટને યાદ કરે છે.

..અને વડોદરાના મહારાજાએ અમરેલીના આંગણે સ્થાપત્યકળાના એક ઉત્તમ નમૂનારૂપ રાજમહેલનું નિર્માણ કરાવ્યું હતું એ પણ યાદ કરે છે. કાલાંતરે આ નજરાણું સત્તાધીશોની ઉદાસીનતાથી ખંડિયેર બની ગયું હતું, રાજમહેલની ભવ્ય ઈમારત જર્જરિત થતી ગઈ, મહેલની કેટલીક દીવાલમાં વૃક્ષ ઊગી નીકળ્યાં, ઠેર ઠેર બેલાના પથ્થરો વિખેરાયેલા પડેલા, તો ક્યાંક ગંદકીના થર જોવા મળતા.

હવે આનંદની વાત એ છે કે વર્તમાન સરકારે આ અણમોલ વારસાને સાચવવાની દિશામાં પગલાં લેવાનાં શરૂ કર્યાં છે.