સ્વમાન સાથેનું દાન એટલે આ વસ્ત્રદાન

કપડાં મફત નહીં આપવાનાં, પણ ફક્ત પચ્ચીસ રૂપિયાના ટોકન ચાર્જ સાથે વેચવાનાં.. જેથી ગરીબોને પણ એ ખરીદીને પહેર્યાનો સંતોષ થાય!

- 

સ્વજનોની યાદમાં સેવાનું કોઈક કામ કરવાની બધાની ઈચ્છા હોય, પણ બહુ સ્વ ઓછા લોકો એવું કામ કરી શકે, જે ફક્ત સમાજ માટે ઉપયોગી નીવડે. એટલું જ નહીં, પણ સમાજની એક સમસ્યાના ઉકેલ તરફ પણ દોરી જાય. પછીથી આ કામ વ્યક્તિગત સેવાકાર્ય મટીને સમાજસેવાનો એક રસ્તો બની જાય છે.

આવો એક રસ્તો ચીંધ્યો છે મૂળ નડિયાદના અને અત્યારે અમેરિકાના ન્યુ જર્સીમાં રહેતા સુભાષ શાહે. સુભાષભાઈનો વતન પ્રત્યેનો એમનો લગાવ બીજા એનઆરઆઈ જેટલો જ ટકોરાબંધ, પણ ગરીબ-જરૂરતમંદોની વસ્ત્રની જરૂરત પૂરી કરવાની એમની આ પ્રવૃત્તિ એમને બીજા એનઆરઆઈ કરતાં થોડી અલગ પાડે છે.

સદ્ગત પત્ની ભગવતીબહેનની યાદમાં એમણે ઝુંબેશ શરૂ કરી ગરીબોને વસ્ત્રો પૂરાં પાડવાની. સાધન-સંપન્ન લોકો પોતાનાં વધારાનાં વસ્ત્રો ગરીબોને દાનમાં આપી દે એ રીતે નહીં, પણ દાન આપનારા અને લેનારા એ બન્નેનું સ્વમાન જળવાઈ રહે એ રીતે, યુઝ્ડ ક્લોથ (વપરાયેલાં, પણ ફાટેલાં નહીં) ભેગાં કરીને ગરીબો સુધી પહોંચાડવાની સેવાનું કામ એમણે હાથ ધર્યું છે.

સુભાષભાઈ એમની શ્રી ભગવતી શાહ સેવા સંકુલ સંસ્થા દ્વારા દેશ-વિદેશમાં વસતા પરિવારોને વધારાનાં વસ્ત્રો દાન માટે અપીલ કરે છે. એ વસ્ત્રો એકત્ર કરીને પછી વિવિધ સેવાભાવી સંસ્થાઓ મારફતે એ જરૂરતમંદોને વેચવામાં આવે.