ઓપનહાઈમર વિશે ઉત્તર-દક્ષિણ ધ્રુવ જેવા અભિપ્રાય કેમ?

‘ઓપનહાઈમર’માં અમેરિકાના ફિઝિસિસ્ટ જુલિયસ રોબર્ટ ઓપનહાઈમની શીર્ષક ભૂમિકામાં કિલિઅન મર્ફી.

- રઘુ જેટલી

આજે, પચ્ચીસ જુલાઈએ મુંબઈના ઑરેન્જ ઍલર્ટવાળા વરસાદના દિવસે બારીમાંથી વરસતા વરસાદને જોતાં જોતાં રઘુ આ લખી રહ્યો છે ત્યારે આગલા દિવસે હિંદી સિનેમાના મિસ્ટર ભારત એટલે કે મનોજ કુમારે એમનો ૮૬મો જન્મદિવસ ઊજવ્યો એના અહેવાલવાળાં છાપાંનો ઢગલો લૅપટૉપ પાસે પડ્યો છે. જો કે છાપાંમાં જે નથી આવ્યું એ રઘુ (સપનામાં) હોલીવૂડ જઈને જાણી લાવ્યો છે.

અખંડ ભારતના અબોટાબાદમાં ૨૪ જુલાઈ, ૧૯૩૭ના રોજ જન્મેલા મનોજ કુમારને યાદ કરીને અમેરિકન ફિલ્મમેકર ક્રિસ્ટોફર નોલાન કયું ગીત ગાતા હશે એ રઘુ જાણી લાવ્યો છે. ઓળખાણ તો પડી ને? ધ ડાર્ક નાઈટ, ઈન્સેપ્શન, ઈન્ટરસ્ટેલાર, ડન્કિર્ક, ટેનેટ જેવી ફિલ્મોથી પોતાનું એક ભાવજગત સર્જનારા રાઈટર-ડિરેક્ટર ક્રિસ્ટોફર નોલાન. મનોજ કુમારને સાંભરી એ જે ગીત ગુનગુનાવી રહ્યા છે ઉસ ગાને કે બોલ હૈઃ સબસે બડા નાદાન વો હી હૈ, જો સમજે નાદાન મુઝે, કૌન કૌન કિતને પાની મેં સબકી હૈ પેહચાન મુઝે.. ઈસ ગાને કો લિક્ખા હૈ વર્મા મલિકને, જિસે અપની મધુર આવાઝ મેં ગાયા હૈ મુકેશજીને ઔર સંગીત સે સજાયા હૈ શંકર-જયકિશનને. બહોત બઢિયા..