ગુજ્જુ ગરબામા અમેરિકન ધમાલ

લગ્નના સંગીતજલસામાં જાણે યુદ્ધમોરચે જવાનું હોય એવી હાકલ પડી અને..

- સુષમા શેઠ

આશી, અમિત, મુકેશભાઈ અને ગીતાબહેન અમેરિકાનાં ખાસ જોવાલાયક સ્થળોની ટુર કર્યા બાદ આશીની માસીને ત્યાં સમયસર પહોંચી ગયાં.

ન્યુ જર્સી નિવાસી અમેરિકા બોર્ન ઍન્ડ બ્રોટઅપ સમીર ઉર્ફે સૅમ એટલે કે માસીના દીકરાનાં લગ્નની તૈયારી જોરશોરથી ચાલી રહી હતી. લગ્નની આગલી સાંજે સંગીતનો જલસો રખાયો હતો અને પરફોર્મન્સ આપવામાં દરેક ફૅમિલી મેમ્બર ભાગ લે એની ખાસ તકેદારી રખાઈ હતી. પરિવારના લોકોને જુદા જુદા ડાન્સનાં સ્ટેપ્સ શીખવવા એક કોરિયોગ્રાફર સાથે નક્કી કરવામાં આવ્યું હતું.

‘ગીતાબહેન–મુકેશભાઈ, તમારે અમારી સાથે ગરબા કમ ભાંગડા ડાન્સમાં જોડાઈ જવાનું છે અને અમિત-આશીએ જબ કોઈ બાત બિગડ જાયે..વાળા સોન્ગ પર ડાન્સ પરફોર્મન્સ આપવાનો છે, ઓકે?’

મુકેશભાઈ ગૂંચવાયા ‘મને એવું બધું ન આવડે.’

‘આમ તો ગીતાબહેન નચાવે એમ નાચો જ છો ને? હા..હા..હા.’ માસાએ રમૂજ કરી એ સાંભળી મુકેશભાઈએ મોઢું બગાડ્યું.

‘ડોન્ટ વરી. કોરિયોગ્રાફર બધું જ શિખવાડશે અને તમારે ક્યાં એકલાએ કરવાનું છે? આ ગ્રુપ ડાન્સ છે.’ માસીના આગ્રહને ગીતાબહેનનો પૂરેપૂરો સપોર્ટ હતોઃ ‘હા હા, જરૂર કરીશું.’ હોંશીલાં ગીતાબહેન તો એ પ્રોગ્રામ માટે ઈન્ડિયાથી ખાસ નવાં ચણિયા-ચોળી પણ લાવેલાં.

‘આવો ચાન્સ ફરી ક્યારે મળશે? એય અમેરિકામાં? જેવું આવડે એવું કરજો, પણ કરજો ખરા. લગ્નના વિડિયોમાં આપણે દેખાવાં જોઈએ.’ ગીતાબહેને મુકેશભાઈને પાનો ચડાવ્યો.

પ્રેક્ટિસ દરમિયાન કોરિયોગ્રાફર વન.. ટુ.. થ્રી.. ફોર.. બોલીને દરેક સ્ટેપ કરાવતો હતો અને સાથે ગીતાબહેન ‘હવે ઉપર એક તાળી, હવે આગળ, હવે ગોળ ફરવાનું પછી નાનકડો કૂદકો મારીને મને તાળી આપવાની.’ એવી સૂચના આપ્યા કરતાં હતાં એટલે મુકેશભાઈને શીખવામાં ખાસ વાંધો ન આવ્યો.