પ્રેમ કરો છો.. પણ એનાં જોખમ જાણો છો?

બાળકોને પરીઓની પ્રણયકથા વાંચવા દો તો જીવનમાં આવતાં સંભવિત ભયસ્થાનોની પણ જાણ કરો.

- ડૉ. મિતાલી સમોવા

તરુણાવસ્થા આવતાં જ માણસના લોહીમાં કોઈ માટેની લાગણી દોડતી થઈ જાય. કોઈ હળવા હાથે ગરદન પર મોરપીંછ ફેરવતું હોય એવો સળવળાટ મનને બેચેન કરી દે. જો કે પ્રણયના આ માહોલમાં આંખો મેં ડૂબ જાને કો હમ બેકરાર બૈઠે હૈ, ઈક પલ મેં સબ લૂટાને કો ઉસપે હી યાર બૈઠે હૈ ગાતાં ગાતાં પ્રેમીપાત્રો ક્યારે પોતાના જ પાર્ટનરનો જીવ લઈ લે એ સમજ પડતી નથી.

સવાલ એ છે કે ખરેખર સમજ નથી પડતી કે આપણે એ ભયસ્થાનો અથવા તો આજની પેઢી જેને રેડ ફ્લૅગ્સ તરીકે ઓળખે એ સ્થિતિ તરફ આંખ આડા કાન કરીએ છીએ?

દિલ્હીમાં ફરી એક વખત આપણને બધાંને હચમચાવી દેનારી દુર્ઘટના બની. ગયા વર્ષે દિલ્હીની ભાગોળે રહેતા આફતાબ પૂનાવાલા નામના યુવાને એની લિવ ઈન પાર્ટનર શ્રદ્ધાની હત્યા બાદ એના શરીરના ટુકડા ટુકડા કરી એનો નિકાલ કર્યો હતો તો હમણાં વળી દિલ્હીના જાહેર રસ્તા પર અનેક વ્યક્તિની અવરજવર સામે સાહિલ ખાન નામના મિકેનિકે એની પ્રેમિકા સાક્ષી પર ચાકુના ૩૪ વાર કર્યા અને એ પછી પથ્થરથી એનું માથું છૂંદી કાઢ્યું. સાક્ષીની ઉંમર હતી ૧૫ વર્ષ તો એનો કહેવાતો આશિક છે માત્ર ૨૦ વર્ષનો!