અસંતોષની આગ ક્યાંક હજી ઠરી નથી..

જમ્મુ-કશ્મીરમાં સેનાનાં વાહન પર હુમલા થાય અને પંજાબમાં ખાલિસ્તાની વિભાજનવાદી બે-બે મહિના સુધી હજારો પોલીસ જવાનોને ચકમો આપતો ફરતો રહે.. આવી ઘટના ભલે છૂટીછવાયી લાગે, એ અવગણવા જેવી નથી. દેશની અંદર પથરાઈને બેસેલા વિઘ્નસંતોષીઓને શોધીને એમને ખરા રસ્તે લાવવાની જરૂર છે.

- હીરેન મહેતા

પાકિસ્તાન સાથેની સરહદને અડીને આવેલાં આપણાં બે રાજ્યમાં હમણાં બે મહત્ત્વની ઘટના બની. ચાર વર્ષ અગાઉ પુલવામામાં સશસ્ત્ર દળોના કાફલાને નિશાન બનાવી પ્રચંડ બૉમ્બ વિસ્ફોટ કરવામાં આવ્યો હતો એનું નાના પાયે જમ્મુ-કશ્મીરમાં પુનરાવર્તન થયું. પાકિસ્તાન સાથેની નિયંત્રણ રેખા નજીકના પુંચ વિસ્તારમાં લશ્કરની એક ટ્રક પર મિસાઈલની જેમ દાગી શકાય એવી ગ્રેનેડથી હુમલો કરવામાં આવ્યો અને એ પછી આખી ટ્રક સળગી ઊઠે એ માટે એના પર સ્ટિકી બૉમ્બ પણ લગાડવામાં આવ્યો. આ આતંકી હુમલામાં લશ્કરના પાંચ જવાનો મૃત્યુ પામ્યા.

આ ઘટનાના ત્રણ દિવસ પછી પંજાબના વિભાજનવાદી આગેવાન અમ્રીતપાલ સિંહની રાજ્યના અંતરિયાળ વિસ્તારમાંથી ધરપકડ કરવામાં આવી. બે મહિના અગાઉ પોતાના અમુક મળતિયા સામે અપહરણનો કેસ થયો ત્યારે આ અમ્રીતપાલ સિંહ બેએક હજાર લોકોનાં ટોળાં સાથે પોલીસસ્ટેશન પર મોરચો લઈ ગયો હતો. પોલીસસ્ટેશનમાં મોટે પાયે ધીંગાણું મચાવી એણે પોતાના એક મળતિયાને છોડવાની પોલીસને રીતસર ફરજ પાડી હતી. એ પછી જાણે મોટો જંગ જીત્યો હોય એમ અમ્રીતપાલ અમૃતસરના સુવર્ણ મંદિર સુધી સરઘસ લઈ ગયો અને શક્તિપ્રદર્શન કર્યું.