અમદાવાદમાં બ્રિજની બબાલ ક્યારે શમશે?

બને એનાં ચાર વર્ષમાં પુલ એવી ભંગાર હાલતમાં હોય કે એ બંધ કરવો પડે! હા, અમદાવાદમાં આવું બન્યું. પહેલી વાર એવુંય બન્યું કે એ માટે આઠ ઈજનેર સામે કારવાઈની ઘોષણા થઈ અને પુલ નવેસરથી બાંધવાનો ખર્ચ એના મૂળ કૉન્ટ્રાક્ટર પાસેથી વસૂલવામાં આવશે.

- મહેશ શાહ (અમદાવાદ)

ડાયમંડ સિટી સુરત સૌથી વધુ (૧૧પ) પુલના લીધે ગુજરાતનું બ્રિજ સિટી પણ કહેવાય છે. બીજા ક્રમે વર્લ્ડ હેરિટેજ સિટી અમદાવાદમાં એંસી જેટલા પુલ છે. એમાં ઐતિહાસિક એલિસ બ્રિજ અને આધુનિક અટલ બ્રિજ સહિત બીજા અમુક પુલનો સમયાંતરે વિવાદ થયો હતો.

તાજો વિવાદ હાટકેશ્વર બ્રિજ અર્થાત્ છત્રપતિ શિવાજી મહારાજ ફ્લાયઓવર બ્રિજ્જો છે. એના કૉન્ટ્રાક્ટર અને પ્રોજેક્ટ કન્સલ્ટન્ટ સામે અમદાવાદના મ્યુનિસિપલ કમિશનરે પોલીસફરિયાદ કરી. પ્રથમ વાર આવું બન્યું.

વાત એ બની કે અમદાવાદમાં ખોખરાથી સીટીએમ તરફના જંક્શન પર નવેમ્બર, ૨૦૧૭માં ૩૯ કરોડના ખર્ચે હાટકેશ્વર ફ્લાયઓવર બ્રિજ બન્યો.

ઈન્ડિયન રોડ કોંગ્રેસ મુજબ બ્રિજનું આયુષ્ય સરેરાશ એકસો વર્ષનું હોય. જો કે અમદાવાદનો આ હાટકેશ્વર બ્રિજ તો આયખાના ચોથા વરસે જ નબળી ગુણવત્તાનો ચાડી ખાવા માંડ્યો. એપ્રિલ, ૨૦૨૧માં બ્રિજમાં પહેલું ગાબડું માઈક્રો કૉન્ક્રીટથી રિપેર કરવામાં આવ્યું. પછી વર્ષમાં વધુ ત્રણ વખત ગાબડાં પડ્યાં અને સળિયા બહાર દેખાવા લાગ્યા એટલે માઈક્રો કૉન્ક્રીટ સાથે સ્ટીલથી રિપેરિંગ થયું. એ પછી પણ પુલ જોખમી લાગ્યો એટલે ઓગસ્ટ, ૨૦૨૨થી બંધ કરવામાં આવ્યો. ઉદ્ઘાટનનાં પાંચ વર્ષમાં જ બ્રિજ બંધ કરવાની નોબત! ગુજરાતમાં આવું સંભવતઃ પહેલી વાર બન્યું હશે.

પુલ બાંધકામનો વિવાદ વકરતો જોઈને કૉન્ટ્રાક્ટરે બ્રિજની ડિફેક્ટ લાયબિલિટી એક જ વર્ષ એટલે કે નવેમ્બર, ૨૦૧૮ સુધીની હોવાનું કહી છટકવાનો પ્રયાસ કર્યો. જો કે ભૂતપૂર્વ કાઉન્સિલર અને કોંગ્રેસી નેતા જ્યોર્જ ડાયસે અમદાવાદના મ્યુનિસિપલ કમિશનર અને ગુજરાતના મુખ્ય મંત્રી, વગેરેને પત્ર લખ્યા.

બીજી તરફ, પુલ અંગે સિમેક લૅબ, કેસીટી લંબ અને આઈટીઆઈટી સુરકીના નિષ્ણાતનું તારણ ચોંકાવનારું હતું. કૉન્ક્રીટની ડેન્સિટી અને સ્ટ્રેન્થ ઓછી જણાય છે!