મામલો દોઢ-બે કરોડની ઉઘરાણીનો.. સામે મળતી ધાકધમકીનો!

વેરાવળના એક તબીબના આપઘાત પ્રકરણમાં ભાજપના સાંસદ સામે ગંભીર આક્ષેપોથી ગુજરાતના રાજકારણમાં વમળ પેદા થયાં છે.

- 

પોતાની હૉસ્પિટલ ઉપર જ રહેતા વેરાવળના ડૉ. અતુલ ચગે આપઘાત કર્યો.

વેરાવળના એસટી બસસ્ટૅન્ડ નજીક આવેલી નવજીવન હૉસ્પિટલનો સ્ટાફ રોજની જેમ ડૉક્ટર સાહેબની પ્રતીક્ષામાં હતો. સવારે દસ વાગ્યાની આસપાસ ડૉ. અતુલ ચગ પોતાની ચૅમ્બરમાં આવી જતા હોય છે, પરંતુ એ દિવસે (૧૨ ફેબ્રુઆરીએ) આ નિત્યક્રમ જળવાયો નહીં. ડૉ. અતુલ ચગનું રહેવાનું એમની હૉસ્પિટલની ઉપરના માળે. ઘરમાં એ એકલા જ રહે.

રોજના સમયે એ આવ્યા નહીં એટલે સ્ટાફે તપાસ કરી. એક કર્મચારીએ બારીમાંથી બેડરૂમમાં જોયું તો આંખો પહોળી થઈ ગઈ. પલંગ પર જ ગળે ફાંસો લગાવેલી હાલતમાં ડૉક્ટરનો દેહ પડ્યો હતો. ઘડીભર કોઈ માનવા તૈયાર ન થયું કે આવું કેમ બની શકે?

તરત પોલીસને ઘટનાની જાણ કરવામાં આવી. ડૉક્ટરના આપઘાતની વાત વાયુવેગે પ્રસરી ગઈ. માત્ર વેરાવળ જ નહીં, આખા પંથકમાં અતુલભાઈનું આત્મહત્યા પ્રકરણ ચર્ચાનો વિષય બની ગયું.