રમવાના નામે રડવાના દિવસો આવી શકે!

રમતના નામે જુગાર રમાડો, આદત લગાડો અને પછી કહો, ‘સંભાળજો!’ લાખો લોકો આજે ઑનલાઈન જુગારના રવાડે ચડી ગયા પછી મોડે મોડે સરકાર એ સામે નિયમ લાવી રહી છે, તેમ છતાં આ વ્યસનનાં જોખમ તો ઊભાં જ રહેશે.

- જયેશ ચિતલિયા

હૃતિક રોશન, શાહિદ કપૂર, અત્તુ કપૂર, દેવેન ભોજાણી, આલોકનાથ આ બધા વચ્ચે શું સામ્ય છે?

પહેલી નજરે તો લાગે કે આ સવાલનો જવાબ તો સિમ્પલ છે, આ બધા ફિલ્મ અને ટીવી પર દેખાતા કલાકારો છે.

એ જ રીતે એમ.એસ. ધોની, વિરાટ કોહલી, રોહિત શર્મા અથવા જસપ્રીત બુમરાહ ક્રિકેટર હોવા ઉપરાંત એ તમામમાં સામ્ય એ કે આ બધા આપણને આપણી પસંદગીની ક્રિકેટ ટીમ બનાવી ઈનામ જીતવાની સલાહ આપે છે.

- પરંતુ ના, અહીં આવી સામ્યતાની વાત કરવી નથી. આપણે બીજી સામ્યતા વિશે જાણવું છે. આ તમામ સ્પોર્ટ્સમેન સ્પોર્ટ્સમેન કે આર્ટિસ્ટ કોઈ ને કોઈ ઑનલાઈન ગેમની ઍડ્વર્ટાઈઝમેન્ટ કરે છે અર્થાત્ આ કલાકારો એવી ઑનલાઈન ગેમનો પ્રચાર કરે છે, જે એક જુગાર સમાન છે. એથી જ ઍડ્વર્ટાઈઝમેન્ટના અંતે ફટફટ બોલવામાં આવે છે (જેથી સાંભળનારાને બરાબર સમજતાં વાર લાગે અથવા તો સમજાય જ નહીં) કે ઈસ ગેમ મેં વિત્તીય જોખીમ રહેતા હૈ ઔર ઈસ કી આદત ભી લગ સકતી હૈ..

આટલું વાંચીને હવે આપ સમજી ગયા હશો કે અહીં શેની વાત થાય છે અને શા માટે થાય છે?

તાજેતરમાં જ સરકારે ઑનલાઈન ગેમ્સ માટેના પ્રસ્તાવિત નિયમો જાહેર કર્યા છે. બહુ મોડે મોડે સરકાર જાગી છે. આવી અનેક ઑનલાઈન ગેમ્સ ચાલી રહી છે અને પૈસાની લાલચમાં લાખો લોકો એમાં ફસાઈ રહ્યા છે, કહો કે એના વ્યસનનો ભોગ બની રહ્યા છે. દારૂ-તમાકુની લતની જેમ લોકો આ આધુનિક સમયના જુગારના રવાડે ચડી રહ્યા છે. પૈસાની તાકાત તો જુઓ, લાખો-કરોડો રૂપિયા કમાતા હોવા છતાં મોટા મોટા સ્ટાર્સ નીતિ અને મૂલ્યોને નેવે મૂકીને લોકોને આવા ખોટા રવાડે ચડાવવાની ભૂમિકા ભજવી રહ્યા છે. એક ઑનલાઈન રમીવાળા તો પોતાના મંચ પર ત્રણ કરોડ લોકો રમતા હોવાની ખુલ્લેઆમ જાહેરાત કરે છે.

શું હોઈ શકે આ દૂષણ રોકવાના નિયમ?