એક બૅન્ક આવી પણ.. ટેન્શન જમા કરાવી ચિંતામુક્તિનું વ્યાજ મેળવો..

આજે જાતજાતની ચિંતાથી લોકો પરેશાન છે ત્યારે રાજકોટમાં એક દિવ્યાંગ યુવાને ‘ચિંતા બૅન્ક’નો પ્રયોગ કર્યો છે. દુઃખ-સુખની લેવડ-દેવડ કરતી આ બૅન્કના વ્યવહારો વિશે જાણવા જેવું છે.

- દેવેન્દ્ર જાની (રાજકોટ)

હીંદી સિનેમાની જૂની ફિલ્મોમાં એક સીન અવારનવાર જોવા મળતોઃ વરસતા વરસાદની રાતે નાયિકા કોઈ અનાથાશ્રમની બહાર પારણામાં નવજાત શિશુને ચિઠ્ઠી સાથે મૂકીને જતી રહે. પછી એ ધૂલ કા ફૂલ અનાથાશ્રમમાં પાંગરે ને સ્ટોરી આગળ વધે.

હવે આ રીતે ચિઠ્ઠીમાં પોતાનાં ટેન્શન મૂકીને જવાની સગવડ રાજકોટમાં એક યુવાને કરી છે. એનું નામ છેઃ ચિંતા બૅન્ક. રાજકોટના ૧૫૦ ફૂટ રિંગ રોડ પર આવેલા કમર્શિયલ બિલ્ડિંગમાં એક ઑફિસની બહાર ચિંતા બૅન્કનું બોર્ડ છે. હા, આ નોખી-અનોખી બૅન્કમાં લોકો પોતાની ચિંતા જમા કરાવે છે.

સ્ટ્રેસ, ટેન્શન, ભાર, બોજ, તાણ, તંગદિલી.. કરોડપતિ, લાખોપતિ, હજારોપતિ કે મધ્યમવર્ગી.. આજે સમાજના કોઈ પણ વર્ગનો માનવી કોઈ ને કોઈ પ્રકારની ચિંતાથી પીડિત છે. કુટુંબો નાનાં થતાં ગયાં, સુખ વધતાં ગયાં તો સામે અવનવા રૂપમાં આવતી ચિંતા વધી રહી છે. સ્માર્ટફોન જેવાં સાધનના દુરુપયોગથી યુવાઓમાં વધી રહેલી નિરાશા, આર્થિક સંકટ, પારિવારિક પ્રશ્નોથી લોકો ઘેરાતાં જાય છે. આ બધું જોઈને રાજકોટમાં એક પ્રયોગ રૂપે ચિંતા બૅન્ક શરૂ થઈ છે.