રસ્તાની આ રાણીઓ ઊતરી છે મેદાનમાં

વડોદરાના આંગણે યોજાયો છે વિશ્વનો સૌથી મોટો વિન્ટેજ કાર શો. છોગામાં છે દુનિયાભરની ૧૨૦ ક્લાસિક કે વિન્ટેજ બાઈક્સ.

- નિતુલ ગજ્જર (વડોદરા)

એ ને તમે દુનિયાનું સૌથી મોટું ઘર કહી શકો. મોટું ઘર એટલે પ૦૦ એકરમાં ફેલાયેલું. બ્રિટનનાં રાજા-રાણીના બકિંગહામ પેલેસ કરતાં પણ ચાર ગણું મોટું ઘર!

..અને આ ઘરને આંગણે આવીને ઊભી છે દેશ-વિદેશની ૨૦૦ જેટલી વિન્ટેજ એટલે કે ૬૦-૭૦ કે ૮૦-૯૦ વર્ષ પહેલાંની કાર.

આ છે દુનિયાનો સૌથી મોટો વિન્ટેજ કાર શો, જેનું યજમાન બન્યું છે વડોદરા.

એશિયાનો સૌથી મોટો વિન્ટેજ કાર શો ૨૧ ગન્સ સૅટ કોન્કોર્સ ડી'એલિગન્સ છેલ્લાં દસ વર્ષથી દિલ્હીમાં યોજવામાં આવે છે. જો કે આ વર્ષે પાંચથી આઠ જાન્યુઆરી દરમિયાન એનું આયોજન કરવામાં આવ્યું છે ગુજરાતના કલ્ચરલ કૅપિટલ વડોદરામાં. વિશ્વના સૌથી મોટા નિવાસસ્થાન એવા વડોદરાના રાજવી પરિવારના લક્ષ્મી વિલાસ પેલેસ ખાતે આ કાર શો ગોઠવવામાં આવ્યો છે. કુલ ચાર દિવસ સુધી ચાલનારા આ કાર શોમાં દુનિયાભરની ૨૦૦ વિન્ટેજ કારનું પ્રદર્શન પણ છે. એકસાથે કોઈ એક સ્થળે ૨૦૦ વિન્ટેજ ગાડીઓનું પ્રદર્શન યોજવામાં આવ્યું હોય એવી આ પ્રથમ ઘટના છે. એ હિસાબે આ દુનિયાનો સૌથી મોટો વિન્ટેજ કાર શો છે. આ કાર શોમાં ભાગ લેવા દેશ-વિદેશથી લોકો આવશે.

ભારતના કેટલાક અમીર ઘરાના અને રાજપરિવારની વિન્ટેજ કાર તો અહીં પ્રદર્શિત કરવામાં આવશે જ એ ઉપરાંત અમેરિકા, ફ્રાન્સ, બેલ્જિયમ અને સ્વિત્ઝરલૅન્ડની પચ્ચીસ કાર વડોદરા લાવવામાં આવી છે. દુનિયાભરની ૧૨૦ ક્લાસિક કે વિન્ટેજ બાઈક પણ અહીં જોવા મળશે.