માસૂમ અરિહાનો છુટકારો ક્યારે?

જર્મનીમાં વિચિત્ર સંજોગ ને કાયદાની ચુંગાલમાં માતા-પિતાથી વિખૂટી પડી ગયેલી દોઢ વર્ષની ફૂલ શી કોમળ બાળકી અને એનાં માવતરની વીતકકથા..

- 

છેલ્લા થોડા સમયથી અમદાવાદ અને મુંબઈ સહિત દેશનાં અનેક શહેરોમાં એક શાંત આંદોલન ચાલી રહ્યું છે, જેમાં ક્યારેક મંચ પર જૈન સાધુ પણ દેખાય છે. રૅલીમાં સૂત્રોચ્ચાર થાય છેઃ અરિહા બચાવો.. ભારત લાવો..

અરિહા શાહ એટલે જર્મનીમાં રહેતાં મૂળ ભારતીય જૈનદંપતી ધારા-ભાવેશ શાહની દોઢેક વર્ષની દીકરી. ધારા મૂળ અમદાવાદનાં, જ્યારે સૉફ્ટવેર એન્જિનિયર ભાવેશ શાહ મુંબઈના પરા ભાઈંદરમાં રહે. ૨૦૧૬ના ડિસેમ્બરમાં ધારા-ભાવેશનાં લગ્ન થયાં. ૨૦૧૮ના ઓગસ્ટમાં કારકિર્દીની સારી તક મળતાં ભાવેશ પત્ની ધારા સાથે જર્મનીના પાટનગર બર્લિન ગયા. ત્રણેક વર્ષ બાદ ૨૦૨૧ના ફેબ્રુઆરીમાં શાહદંપતીના ઘરે દીકરી અરિહા જન્મી. ઘરમાં આનંદ આનંદ છવાઈ ગયો. પુત્ર-પુત્રવધૂની આ ખુશીમાં સહભાગી થવા તથા પૌત્રીને રમાડવા ભાવેશનાં માતા પ્રેમલતા શાહ જર્મની પહોંચ્યાં.

બધું સરસ ચાલી રહ્યું હતું ત્યાં જ...

૧૭ સપ્ટેમ્બરે પ્રેમલતાબહેન અરિહાનું ડાયપર બદલતાં હતાં ત્યારે અજાણતાં અરિહાના ગુપ્તાંગ પર હળવી ઈજા થઈ. આ એક માનવચૂક હતી. થોડું લોહી નીકળતાં સાસુ-વહુ અરિહાને હૉસ્પિટલ લઈ ગયાં. હૉસ્પિટલે મામૂલી ટ્રીટમેન્ટ આપી આમાં કંઈ ગભરાવા જેવું નથી કહીને એમને ઘરે મોકલી દીધાં.

અરિહાને એનાં માતા-પિતા ધારા તથા ભાવેશ શાહ સાથે પાછી મેળવી આપવા ઠેર ઠેર રૅલી નીકળે છે.