એકલા નથી આ એકલારામ

નસ નસમાં ગુજરાતી સાહિત્ય ભરીને બેઠેલા કવિતભાઈ રજાના દિવસોમાં પુષ્કળ વાંચે છે, પણ ઘરને બદલે પ્રાકૃતિક સ્થળોએ જઈને વાંચવાનું પસંદ કરે

- 

ડૉ. કવિત પંડ્યા અધ્યાપક

મુંબઈમાં ૧૪-૧૫ વર્ષથી એકલા રહેતા કવિત પંડ્યા ચિત્રલેખાને સ્પષ્ટ કહે છે કે ઘરમાં હું એકલો જરૂર રહું છું, પણ એકલો પડતો નથી. માતા-પિતા, બહેન, ભત્રીજી, વગેરેનો પ્રેમાળ પરિવાર છે. હા, પરિવારથી ૭૦૦ કિલોમીટર દૂર રહું છું, પણ મને એવું લાગતું નથી.

૨૦૦૮-૦૯માં કવિતભાઈએ વતન ભાવનગરથી મુંબઈની વાટ પકડી અભિનય-દિગ્દર્શનમાં કરિયર બનાવવા. જો કે એમના ભાગ્યમાં સાહિત્યસેવા અને અધ્યાપન લખ્યું હતું એટલે એ કાળક્રમે મુંબઈની એસએનડીટી યુનિવર્સિટીમાં ગુજરાતી ભાષા વિભાગમાં આસિસ્ટન્ટ પ્રોફેસર તરીકે જોડાયા.

ભાવનગરની શામળદાસ કૉલેજમાંથી એમએ અને પછી પીએચ.ડી. (વિષયઃ ગુજરાતી નાટકોનું કથનશાસ્ત્ર) થનારા કવિતભાઈના એક પુસ્તકને ગુજરાતી સાહિત્ય અકાદમીનો પુરસ્કાર પણ મળ્યો છે.