സ്കോർ കുറയല്ലേ; വായ്പ മാത്രമല്ല ജോലിയും കിട്ടില്ല

സ്വാശ്രയസംഘങ്ങളിലെ അംഗങ്ങൾ, കൃഷിക്കാർ തുടങ്ങിയവർക്ക് പ്രത്യേക ക്രെഡിറ്റ് സ്കോർ സംവിധാനം ഉടൻ നിലവിൽവരും.

- സി.എസ്.രഞ്ജിത്ത് പ്രമുഖ കോളമിസ്റ്റും വേൾഡ് ബാങ്ക് കൺസൽറ്റന്റുമാണ് ലേഖകൻ.

മെച്ചപ്പെട്ട ക്രെഡിറ്റ് ഹിസ്റ്ററി ഉണ്ടായിരിക്കണം, അതതു ബാങ്കുകൾക്കു ബാധകമായ സിബിൽ സ്കോർ പാലിക്കണം.

ഇതു വായ്പയ്ക്ക് അപേക്ഷിക്കുന്നവരോടല്ല, രാജ്യത്തെ പൊതുമേഖലാ ബാങ്കുകളിലേക്ക് ഓഫിസർ, മാനേജർ തസ്തികകളിലേക്ക് അപേക്ഷ ക്ഷണിച്ചു കൊണ്ട് അടുത്തിടെ വന്ന വിജ്ഞാപനത്തിലെ നിബന്ധനയാണ്.

എന്താണ് ഇത് അർഥമാക്കുന്നത്? ക്രെഡിറ്റ് സ്കോർ കുറഞ്ഞാൽ ഇനി വായ്പ കിട്ടില്ലെന്നു മാത്രമല്ല മെച്ചപ്പെട്ട ജോലിയും തടസ്സപ്പെടുമെന്നതുതന്നെ.

ക്രെഡിറ്റ് സ്കോർ സംബന്ധിച്ച് റിസർവ് ബാങ്ക് അടുത്തിടെ വരുത്തിയ പരിഷ്കാരങ്ങൾ ഈ രംഗത്ത് കൂടുതൽ ആധികാരികതയും സുതാര്യതയും ഉറപ്പാക്കും.

ക്രെഡിറ്റ് സ്കോർ എന്ത്? എങ്ങനെ?

ട്രാൻസ് യൂണിയൻ സിബിൽ, എക്സ്പീരിയൻ ക ഡിറ്റ് ഇൻഫർമേഷൻ കമ്പനി ഓഫ് ഇന്ത്യ, ഇക്യു ഫാക്സ് ക്രെഡിറ്റ് ഇൻഫർമേഷൻ സർവീസസ്, സി ആർഐഎഫ്, ഹൈമാർക് ക്രെഡിറ്റ് ഇൻഫർമേഷൻ സർവീസസ് എന്നിങ്ങനെയുള്ള ക്രെഡിറ്റ് റേറ്റിങ് കമ്പനികളാണ് ക്രഡിറ്റ് സ്കോർ തയാറാക്കുന്നത്.

ബാങ്കുകളും മറ്റു ധനകാര്യ സ്ഥാപനങ്ങളും നൽകുന്ന വായ്പകൾ, ക്രെഡിറ്റ് കാർഡുകൾ തുടങ്ങിയവയുടെ വിവരങ്ങൾ ക്രോഡീകരിച്ചാണ് വ്യക്തികളുടെ ക്രെഡിറ്റ് സ്കോർ ഉൾപ്പെടുന്ന ക്രെഡിറ്റ് റിപ്പോർട്ട് തയാറാക്കുന്നത്. വ്യത്യസ്ത കമ്പനികൾ ക്രെഡിറ്റ് സ്കോർ കണക്കുകൂട്ടാൻ ഉപയോഗിക്കുന്ന മാനദണ്ഡങ്ങളിൽ വ്യത്യാസങ്ങളുണ്ട്. എന്നാൽ, നേരത്തെ എടുത്തിട്ടുള്ള വായ്പകളുടെ തിരിച്ചടവുചരിത്രം, നിലവിലുള്ള വായ്പകൾ എന്തിനുള്ളതാണ്, വായ്പാ തുക, അതിന്റെ വിനിയോഗം, തിരിച്ചടവിലെ വീഴ്ചകൾ, പുതിയ വായ്പകൾക്കായി നടത്തുന്ന അന്വേഷണം തുടങ്ങിയ ഘടകങ്ങളാണ് പ്രധാനമായും ഉപയോഗിക്കുന്നത്.

300-900നും ഇടയിലുള്ള മൂന്നക്ക സംഖ്യയാണ് ക്രെഡിറ്റ് സ്കോർ. 750നു മുകളിലായാൽ എക്സലന്റും 650-750നും ഇടയിലായാൽ നല്ല സ്കോറും ആണ്. അതിനു താഴെ 550 വരെ ശരാശരി സ്കോർ എന്നുമാണ് പൊതുവെ വിലയിരുത്തുന്നത്.