കല്ലുമ്മക്കായ്കൊണ്ട് കാസർകോടുകാരന്റെ കലക്കൻ ബിസിനസ്

ഖത്തറിൽ തുടങ്ങിയ സംരംഭം പാളിയതിനാൽ വലിയ എതിർപ്പാണ് കുടുംബത്തിൽനിന്നുണ്ടായത്.

- 

കല്ലുമ്മക്കായ് വളരെ പ്രധാനപ്പെട്ട ഒരു വിഭവമാണ്. പ്രത്യേകിച്ച് മലബാറുകാർക്ക്. ഈ രംഗത്തെ അവസരങ്ങൾ നന്നായി ഉപയോഗപ്പെടുത്തി സ്വന്തമായി ബിസിനസ് ചെയ്യുകയാണ് സുഹൈൽ മുപ്പൻ എന്ന ചെറുപ്പക്കാരൻ, കാസർകോട് തൃക്കരിപ്പൂരിനടുത്ത് തങ്കയത്താണ് സുഹൈലിന്റെ "എസ്ആർ ഫുഡ്സ്' എന്ന സ്ഥാപനം.

എന്താണ് ബിസിനസ്?

കല്ലുമ്മക്കായ് അട, കല്ലുമ്മക്കായി ഫ, കല്ലുമ്മക്കായ് മസാല, കല്ലുമ്മക്കായ് മിക്സ് തുടങ്ങിയവയാണ് ഉൽപന്നങ്ങൾ. ഓർഡറനുസരിച്ച് സ്പെഷൽ കല്ലുമ്മക്കായ് വിഭവങ്ങളും തയാറാക്കി നൽകും.

എന്തുകൊണ്ട് ഈ ബിസിനസ്?

ഏഴു വർഷക്കാലം ഖത്തറിൽ ഒരു ഇവന്റ് മാനേജ്മെന്റ് കമ്പനിയിൽ ജോലിചെയ്തിട്ടും കാര്യമായ സമ്പാദ്യമൊന്നും ഉണ്ടാക്കാൻ കഴിഞ്ഞില്ല. അവിടെവച്ച് സംരംഭങ്ങളുടെ വിഡിയോകൾ കാണുന്നതും സമ്പാദ്യം മാസികയിലെ "ബിസിനസ് ഫോർ യു' വായിക്കുന്നതും പതിവായിരുന്നു. അങ്ങനെയാണ് ഭക്ഷ്യസംരംഭം തുടങ്ങാനുള്ള പ്രചോദനം ലഭിച്ചതെന്ന് സുഹൈൽ പറയുന്നു.

ആദ്യം ഖത്തറിൽ തന്നെ സ്നാക്സ് ഉൽപന്നങ്ങളുടെ ലഘുസംരംഭം തുടങ്ങി. കൂടുതൽ ഐറ്റം ഉണ്ടാക്കാനുള്ള പ്രയാസവും തൊഴിലാളികളെ ആവശ്യത്തിനു കിട്ടാത്തതും കാരണം അതു വിജയം കണ്ടില്ല. കുടുംബത്തിനൊപ്പം ജീവിക്കാനായി ഗൾഫ് ഉപേക്ഷിച്ചു നാട്ടിലെത്തി. അങ്ങനെയാണ് ഇവിടെ സംരംഭം തുടങ്ങാൻ തീരുമാനിച്ചത്.