പ്രാർഥിക്കാൻ ഓരോ കാരണങ്ങൾ

പ്രെയർ ഏരിയ എങ്ങനെ വ്യത്യസ്തമാക്കാം എന്നു ചിന്തിക്കുന്നവർക്കായി ഇതാ കുറച്ചു ഡിസൈനുകൾ

- 

ഐശ്വര്യം നിറയുന്ന വീടാണ് ഏവരുടെയും സ്വപ്നം. ദൈവിക സാന്നിധ്യം നിറയുന്ന പൂജാ മുറികൾ അതിനു സഹായിക്കുമെന്നു കരുതുന്നവരാണ് അധികവും. അതുകൊണ്ടു തന്നെ എത്ര ചെറിയ വീട്ടിലും പ്രെയർ ഏരിയ ഒരുക്കി വരുന്നു. പഴയതു പോലെ വിശാലവും കൊത്തുപണികൾ നിറഞ്ഞതുമായ പൂജാ മുറികൾക്കു പകരം ചെറുതും ലളിതവുമായ പ്രെയർ ഏരിയകളാണ് ട്രെൻഡ്. കാണാൻ സുന്ദരം, വൃത്തിയാക്കാൻ എളുപ്പവും. പൂജാ മുറികളിലെ പുതു ഡിസൈനുകൾ പരിചയപ്പെടാം.

പരമ്പരാഗത ഭംഗിയോടെ

വീട്ടുകാർക്ക് നമസ്കരിക്കാനുള്ള സൗകര്യത്തിനാണ് വീതി കുറഞ്ഞ് നീളം കൂടിയ പൂജാ മുറി പ്രത്യേകമായി നൽകിയത്. പരമ്പരാഗത ഭംഗിക്കായി ഒരു ചുമരിൽ ചെങ്കല്ല് ക്ലാഡിങ് ചെയ്തു. പ്രധാന വിഗ്രഹത്തിനു പിന്നിൽ സ്റ്റോൺ ക്ലാഡിങ്. പടികൾ നൽകി അതിലാണ് വിളക്കും അനുബന്ധ സാമഗ്രികളും വൃത്തിയാക്കാൻ എളുപ്പത്തിന് ഗ്രാനൈറ്റ് പാകിയ പടികളിൽ പൂജാ സാധനങ്ങൾ സൂക്ഷിക്കാൻ സ്റ്റോറേജുണ്ട്. വെള്ള ചുമരിൽ നീഷുകൾ നൽകി ദശാവതാര വിഗ്രഹങ്ങൾ വച്ചു.

കടപ്പാട്: ആർക്കിടെക്ട് ആതിര പ്രകാശ്, കൊച്ചി

സിമന്റ് ടെക്സ്ചർ ഫിനിഷിൽ

ഭിത്തി ഉള്ളിലേക്കെടുത്ത് "നീഷ് ഏരിയ' ഒരുക്കിയാണ് പയർ ഏരിയ ക്രമീകരിച്ചത്. ചുമരിന്റെ മധ്യഭാഗം സിമന്റ് ടെക്സ്ചർ ഫിനിഷ് നൽകി ഹൈലൈറ്റ് ചെയ്തു. അതിൽ രണ്ട് കോപ്പർ സ്ട്രിപ്പുകൾ നൽകി കൂടുതൽ ഭംഗിയേകി. ചുമരിൽ യേശുവിന്റെ ചിത്രം നൽകി രണ്ട് തട്ടുകൾ നൽകി അതിലും രൂപങ്ങൾ വച്ചിട്ടുണ്ട്. മുകളിൽ സ്പോട്ട് ലൈറ്റുമുണ്ട്.