കളയാനുള്ളതല്ല ഗ്രേ വാട്ടർ

ഇനി അധികകാലം ഗ്രേ വാട്ടർ റീസൈക്ക്ളിങ്ങിനു നേരെ മുഖം തിരിക്കാനാകില്ല! ഈ രംഗത്തെ സാധ്യതകൾ അറിയാം

- 

മഴവെള്ളം സംഭരിക്കുന്നതോ കരുതലോടെയുള്ള ജല വിനിയോഗമോ പഠിപ്പിക്കാനായിട്ടില്ല; പിന്നെയല്ലേ ഗ്രേ വാട്ടർ റീസൈക്ക്ളിങ്! ഒന്നു പോ ആശാനേ... ശരാശരി മലയാളിയുടെ ഈ ആറ്റിറ്റ്യൂഡിന് ഇളക്കം തട്ടി തുടങ്ങിയിരിക്കുന്നു. ആദ്യം മടിച്ചു നിന്നെങ്കിലും ബാംഗളൂരുവിനെയും ചെന്നൈയെയും പിൻപറ്റുകയാണ് കേരളവും. മെട്രോ നഗരമായ കൊച്ചിയും ഒപ്പം തിരുവനന്തപുരവും കോഴിക്കോടുമൊക്കെ ജല പുനരുപയോഗത്തിന്റെ സാധ്യതകൾ തേടിത്തുടങ്ങിയിരിക്കുന്നു.

എന്താണ് ഗ്രേ വാട്ടർ?

വീട്ടിലെ പാത്രം കഴുകിയതും തുണി നനച്ചതുമായ വെള്ളം, വാഷ്ബേസിനിൽ കൈയും മുഖവും കഴുകാൻ ഉപയോഗിച്ച വെള്ളം, ബാത്റൂമിൽ കുളിക്കാനുപയോഗിച്ച വെള്ളം തുടങ്ങിയവയാണ് " ഗ്രേ വാട്ടർ' എന്ന ഗണത്തിൽപ്പെടുന്നത്. അടുക്കളയിൽ പച്ചക്കറികളും മറ്റും കഴുകാൻ ഉപയോഗിച്ച വെള്ളവും ഇതിലുൾപ്പെടും. " ഗ്രേ വാട്ടർ' എന്നാൽ മലിനജലമല്ല. സോപ്പ്, ഡിറ്റർജന്റ്, മറ്റ് രാസവസ്തുക്കൾ എന്നിവ അധികമായി അടങ്ങിയിട്ടില്ലാത്ത വെള്ളമാണ് ഈ വിഭാഗത്തിൽപ്പെടുക. ടോയ്ലറ്റ് ആവശ്യങ്ങൾക്ക് ഉപയോഗിച്ച വെള്ളം "ബ്ലാക്ക് വാട്ടർ' വിഭാഗത്തിലാണ് ഉൾപ്പെടുക.

കുടിക്കാൻ പോലും വെള്ളം തികയാത്ത സ്ഥലങ്ങളിൽ ഗ്രേ വാട്ടർ റീസൈക്ളിങ് ഒരു ഉപായമല്ല, അനിവാര്യതയാണ്. തറ വൃത്തിയാക്കുക, തുണി കഴുകുക, വാഹനം വൃത്തിയാക്കുക, ടോയ്ലറ്റ് ഫ്ലഷിങ് തുടങ്ങിയ ആവശ്യങ്ങൾക്കെല്ലാം ശുദ്ധീകരിച്ച ഗ്രേ വാട്ടർ ഉപയോഗിക്കാം. വീടുകൾക്കു മാത്രമല്ല, ആയിരക്കണക്കിന് ആളുകൾ തിങ്ങിപ്പാർക്കുന്ന പാർപ്പിട സമുച്ചയങ്ങൾക്കും ഒരേപോലെ അനുയോജ്യമാണ് ഈ മാർഗം.

ഒട്ടും സങ്കീർണമല്ലാത്തതും ചെലവുകുറഞ്ഞതുമായ രീതിയിൽ വീട്ടിൽ ഗ്രേ വാട്ടർ റീസൈക്ളിങ് സംവിധാനം ഏർപ്പെടുത്താം. ഇത് വീട്ടുകാർക്കു തനിയെ ചെയ്യാവുന്നതേയുള്ളൂ.

സങ്കീർണമല്ല; എളുപ്പത്തിൽ ചെയ്യാം